«Ertis ormanynda» qaraǵaıdy zańsyz kesken er adam ustaldy

<p>PAVLODAR. KAZINFORM - Er azamat aıryqsha qorǵaýǵa alynǵan 5 túp jalqaraǵaıdy baltalap qulatqan. Bul zańsyzdyǵy úshin ol 553 myń teńge aıyppul arqalady.</p>

Orman rezervatyndaǵy zańsyz aǵash kesý oqıǵasy týraly polıtseıler habarlady.

Polıtseılerdiń aıtýynsha, qazirgi ýaqytta Pavlodar oblysynyń aýmaǵynda «Brakoner» jedel aldyn alý is-sharasy júrip jatyr.

«Rezervattyń Baýyrtal orman sharýashylyǵynda aǵashtardyń zańsyz otalǵany anyqtaldy. Er adam 5 túp qaraǵaıdy baltalap tastaǵan. Zań buzýshy jaýapkershilikke tartyldy, oǵan 150 aılyq eseptik kórsetkish mólsherinde aıyppul salyndy», - dep habarlady óńirlik Polıtsııa departamentinen.

Jedel aldyn alý is-sharasy aıasynda tártip saqshylary tabıǵat qorǵaý zańnamasyn buzý boıynsha 47 kemshilikti anyqtaǵan. Onyń 30-y zańsyz ań aýlaýǵa jáne taǵy 13-i balyq aýlaý tártibin buzýǵa qatysty. Oblystyq jergilikti Polıtsııa basqarmasynyń bastyǵy Qýanysh Mustafınov baıan etkendeı, polıtseıler azamattardan 50 keli balyq, benzınmen jumys isteıtin ara jáne bir avtokólikti tárkilegen. Zań buzýshylar jalpy somasy 3 mln teńgeden astam aıyppul arqalady.