«Ertis ormany» rezervatynda bıyl qaraǵaıdyń 14 mln kósheti otyrǵyzylady
Bıyl «Ertis ormany» rezervatynyń Shaldaı jáne Besqaraǵaı fılıaldaryndaǵy tuqymbaqtarynda eki jyldyq qaraǵaı kósheti boıynsha — 4 mln 614,7 myń dana, bir jyldyq boıynsha 27 mln 137,3 myń dana ekpe materıaldary ósirilgen.
Mekemeniń baspasóz qyzmetinen habarlaǵandaı, bul kóshetter orman alqaptaryna otyrǵyzý úshin daıyndalady.
«Eki jyldyq qaraǵaı kóshetteriniń tamyry qajetti tereńdik boıynsha — 25-30 sm uzyndyqta kesiledi. Kóshetti salý úshin traktorlardyń kómegimen ormanshylar jer qabatyn aýdarmaı kóteredi. Sodan soń óskinderdi arnaıy qar úıindilerimen birge aparyp kómedi. Tamyry qar kesegimen jáne shóppen nyǵyzdalǵan qaraǵaı kóshetteri shilde aıyna deıin sol kúıinde jetilmeı saqtalyp turady. Tamyryndaǵy qar tek shilde aıynda erip, kún ystyqta kóshettiń tez jetilýine nár bere bastaıdy. Osylaısha arnaıy tehnologııanyń arqasynda qaraǵaı ekpelerin jazdyń ystyq kúnderinen aman-esen alyp shyǵamyz», - dep túsindirdi kóshetterdi otyrǵyzý ádisi jaıynda rezervat basqarmasynyń ormandy qalpyna keltirý ınjeneri Elena Ostapenko.
2024 jyly 14 mln ekpe kóshetti jalpy aýmaǵy 2828 gektarda otyrǵyzý josparlanyp otyr. Onyń 1048 gektary — kóktemde, 1780 gektary kúzde egiledi. Otyrǵyzý qolmen jáne mehanıkalandyrylǵan tásilmen júrgiziledi. Qazirgi ýaqytta kóshetterdi qazyp alýǵa mekemeniń 500-ge jýyq qyzmetkeri jumyldyrylǵan.
Eske sala keteıik, naýryz aıynda Ertis ormanshylary qaraǵaı kóshetterin otyrǵyzý úshin kóktemgi ylǵal jınaýdy bastap ketken.
«Ertis ormanyndaǵy» qaraǵaı arasynan sileýsin kózge tústi.