Ertis-Qaraǵandy kanaly - Sátbaev túrtki bolǵan ǵasyr jobasy

<p>PAVLODAR. KAZINFORM - Shapyq Shókın bastaǵan otandyq ǵalymdar 1949-1958 jyldary Ortalyq Qazaqstandy sýmen qamtamasyz etý máselesin Ertis ózenin burý negizinde sheshýge bolatyndyǵyn dáleldedi. Bul ıdeıaǵa túrtki bolǵan Qazaqstan Ǵylym akademııasynyń tuńǵysh prezıdenti Qanysh Sátbaev bolatyn.</p>

Búkil respýblıka boıynsha sý qorynyń nebári 7 paıyzy ǵana Saryarqa dalasyna tıesili ekenin estigen Qanaǵań aıran-asyr bolypty. Respýblıka otynynyń 70 paıyzyn berip otyrǵan elimizdiń ortalyq bóliginde osynshama sý tapshylyǵynyń bolýy adamdy lajsyz qaldyratyn sandar ǵoı. Bul eki kórsetkishtiń arasalmaǵyn teńestirmeıinshe jer baılyǵyn el ıgiligine usyný múmkin emes edi. 

Foto: vıdeodan alynǵan kadr

Sátbaev osy tusta otandyq ǵalymdardyń aldyna bolashaqta Ertis-Qaraǵandy atalǵan sý arnasyn salý máselesin qoıdy. Buǵan jergilikti gıdrologııalyq ınstıtýttardyń kóbi qarsy bolyp, jerasty sýlaryn alýdy usynady. Talas-tartysqa toly kúnderde Qazaqstan energetıka ınstıtýtynyń dırektory, qazaqtyń tuńǵysh energetıka ǵalymy Shapyq Shókın Sátbaevtiń aldyna kelip, esebin jaıyp salady.

Foto: Ekibastuz ortalyqtandyrylǵan kitaphana júıesi

«Vodokanalproekt» mekemesi salmaqshy bolyp otyrǵan sý qoımasy eń myqtaǵanda jylyna 585 mln tekshe metr sý berýge qabiletti. Al Ortalyq Qazaqstan óndiristerine kem degende 2-2,5 mlrd tekshe metr sý qajet. Osy dáleldemesinen keıin kanal qurylysyna qarsy bolǵandardyń aýzyna qum quıyldy. Qanysh Imantaıulynyń tapsyrmasy boıynsha Sh. Shókın qazirgi sý arnasynyń jobasyn ázirledi. Ondaǵan jyldar boıy qazaqtyń qos myqty ǵalymy bul jobany aqyldasa otyryp, jetildirdi.

Foto: Potanın atyndaǵy Pavlodar oblystyq tarıhı-ólketaný mýzeıiniń qory

Mynaý sýrette beınelengen qos alyp – Sátbaev pen Shókın 1959 jyly Almatyda túsipti. Bul fotosýretti jýyqta Buqar jyraý atyndaǵy ádebıet jáne óner mýzeıiniń qyzmetkerleri óńirlik Potatın atyndaǵy tarıhı-ólketaný mýzeıiniń qorynan tapty. Taý tulǵanyń shákirti atanǵan Sh. Shókın Sibir ózenderin Qazaqstan men Orta Azııaǵa burý máselesin ǵylymı turǵyda qarastyrǵan alǵashqy ǵalymdardyń biri ekenin aıtyp ótken abzal.

Aıta keteıik, jýyrda Baıanaýyldan akademık Qanysh Sátbaev paıdalanǵan jazý mashınkasy tabyldy. Jádigerdi baıanaýyldyq erli-zaıypty Mıhaıl jáne Galına Baek otbasy uzaq ýaqyt saqtap kelgen.