Ertis – dostyq ózeni: Abaı oblysynda «Móldir bulaq» aptalyǵy ótip jatyr
Aýdan basshylyǵy, kent turǵyndary, úkimettik emes uıymdar, ulttyq ortalyqtar, jastar, mektep túlekteri, mekeme qyzmetkerleri jáne zııaly qaýymnyń qatysýymen kent kósheleri men Ertis ózeniniń jaǵasynda senbilik ótti.
Shúlbi kenti aqsaqaldar keńesiniń múshesi Beısen Lepsibaev jınalǵandarǵa alǵysyn bildirip, bastama bir rettik aktsııa bolmaýy tıis ekenin aıtty.
— «Taza Qazaqstan» aktsııasyn ótkizýdegi maqsat — tabıǵatqa uqypty qaraýdy qalyptastyrý, eldi mekenderdi abattandyrýdy, kógaldandyrýdy turaqty júrgizý. Bul — bizdiń ulttyq qundylyqtarymyzdyń beınesi. Halqymyzdyń bir shańyraq astyndaǵy dostyǵy men ózara túsinistigi jalǵasyp, elimizdegi beıbitshilik árqashan berik bolsyn, árqashan birlik bolsyn, -deıdi eńbek ardageri.
Bul kúni aktsııaǵa qatysýshylar 200-den astam aǵash kóshetterin otyrǵyzyp, ortalyq kósheler men Ertis ózeniniń jaǵalaýyna ekologııalyq tazalaý júrgizdi.
Aktsııaǵa 300-den astam adam qatysty. Arnaıy tehnıkanyń kómegimen 5 tonnaǵa jýyq qoqys shyǵaryldy.
— «Móldir bulaq» aptalyǵy bizdiń aýdanda ótip jatyr. Osy apta — «Taza Qazaqstan» aktsııasynyń bir bóligi jáne biz de oǵan qatysýǵa sheshim qabyldadyq. Kósheler men aýmaqtardy tazalaýda ǵana emes, qarttarǵa da kómektesip, jastarǵa úlgi kórsetemiz, — dedi Jastar keńesiniń múshesi Aınur Satybaldınova.
Memleket basshysy usynǵan bastamany Jańasemeı aýdanynyń jastary Borodýlıha aýdanynyń jastaryna joldap, tabıǵatqa uqypty qaraýǵa shaqyrdy.
Oblysta barlyǵy 1 068 sý aǵyny men ózen, 55 kól, sondaı-aq 95 gıdrotehnıkalyq qurylys bar.