Ertis-Baıan óńirinde kıikterdiń sany bes ese kóbeıgen

<p>PAVLODAR. KAZINFORM - Tabıǵat qorǵaý ınspektorlary Pavlodar oblysynyń aýmaǵynda 20 myńnan asa aqbóken baryn aıtady. Olardyń sany sońǵy tórt jylda bes ese ósken.</p>

Elimizde aqbókenderdiń biregeı popýlıatsııasyn saqtaý úshin 1 jeltoqsannan «Aqbóken» aktsııasynyń ekinshi kezeńi bastalady. Aktsııa maqsaty – janýardyń popýlıatsııasyn saqtaý, brakonerlikpen kúresý, sondaı-aq sırek kezdesetin janýarlardy zańsyz aýlaý jáne olardyń múıizderi men basqa da ónimderin satýdy toqtatý.

- Aktsııa barysynda kıikterdiń sanyn jáne olardyń popýlıatsııasynyń jaı-kúıine monıtorıng júrgiziledi. Aqbókender mekendeıtin jáne kóship-qonatyn jerlerin, ásirese, kóbeıý kezeńinde qorǵaý sharalary kúsheıtiledi. Ertis-Baıan óńirinde aqbókenderdiń Betpaqdala popýlıatsııasy mekendeıtin aýmaqtaryna erekshe nazar aýdarylady. Olardyń negizgi mekendeý oryndary – Maı jáne Baıanaýyl aýdandary. Bıyl oblystaǵy aqbókenderdiń sany 20 myńnan asty, bul 2020 jylmen salystyrǵanda bes ese kóp. Jyl basynan beri 12 reıd ótkizildi, zańbuzýshylyqtar anyqtalǵan joq. 2019 jyldan bastap oblysta aqbókenderge qatysty brakonerlik faktileri tirkelmegen,-deıdi Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev.

Kıikterdi aýlaǵany (nemese olardyń múıizin alsa) úshin 6000 aılyq eseptik kórsetkishke deıingi aıyppul salý nemese 3 jyldan 10 jylǵa deıin bas bostandyǵyn shekteý, sondaı-aq múlikti tárkileý sharasy qoldanylady.

Eske sala keteıik, Baıanaýyl ormandarynda bulan kózge tústi.