Ertiske batyp bara jatqan úsh balany qutqarǵan Pavlodar turǵynyna páter berildi

PAVLODAR. QazAqparat - Pavlodar oblysynyń ákimi Ábilqaıyr Sqaqov Aqtoǵaı aýdanynyń turǵyny Andreı Karandashovqa alǵys aıtyp, úsh bólmeli páterdiń kiltin syılady, dep habarlaıdy QazAqparat.

Tótenshe jaǵdaı 15 shilde kúni Aqtoǵaı aýdanynyń Prırechensk aýylynda bolǵan.

Bir otbasynyń jeti jasar egiz uly men olardyń toǵyz jasar aǵasy Ertiske batyp kete jazdady.

Aýyldastarynyń jedel áreketiniń arqasynda balalardyń úsheýi de aman qaldy.

Ol baldyrǵandarǵa oqıǵa ornynda alǵashqy medıtsınalyq kómek te kórsetti.

Oblys ákimi Andreı Karandashovqa «Oblys aldynda sińirgen eńbegi úshin» tósbelgisi men úsh bólmeli úıdiń kiltin syılap, erligi úshin alǵys aıtty.

«Bul - erlik qana emes, biz úshin baǵa jetpes jáne siz qutqarǵan balalar úshin asa mańyzdy naǵyz qaharmandyq áreket. Óńirimizde siz sııaqty azamattar bolǵanyna maqtanamyn. Ata-anańyzǵa ózińizdeı elimizdiń adal azamatyn tárbıelegeni úshin kóp rahmet. Sizge óńir turǵyndarynyń atynan alǵys aıtamyn», - dedi Ábilqaıyr Sqaqov.

Andreı Karandashov - Aqtoǵaı aýdanyndaǵy Prırechensk aýylynyń týmasy.

Otbasynda eki bala tárbıelep otyr. Qazirgi kezde «Aqtoǵaı-Agro» JShS-de jumys isteıdi. Osy ýaqytqa deıin onyń otbasy jaldamaly úıde turǵan edi.

Buǵan deıin otyz úsh jasar aýyl turǵynyn Pavlodar oblysynyń tótenshe jaǵdaılar departamentinde jáne Aqtoǵaı aýdanynyń ákimdigi marapattaǵan edi.

Foto: t.me/baspasozpvl