Ertis jastary elorda kúnine oraı Aqbet shyńyna shyqty

PAVLODAR. QazAqparat - Pavlodar memlekettik pedagogıkalyq ýnıversıtetiniń jastary elorda kúnine oraı bıiktigi 1023 metrdi quraıtyn Aqbet shyńyna shyqty, dep habarlaıdy QazAqparat pavlodarnews.kz silteme jasap.

Pavlodar memlekettik pedagogıkalyq ýnıversıteti jastar saıasaty departamentiniń basshysy Ǵabıt Hafız bul jetistikti Nur-Sultan qalasynyń týǵan kúnine arnaıtynyn atap ótti.

«Aqbet taýynyń shyńy - Ertis-Baıan óńiriniń eń bıik núkteleriniń biri sanalady, - deıdi Ǵabıt Hafız. - Onyń teńiz deńgeıinen bıiktigi - 1023 metr. Shyń basyna deıingi soqpaq joldyń uzyndyǵy 5 shaqyrymnan asady. Bıiktikti baǵyndyrýǵa ýnıversıtetimizdiń jastary tańǵy samalmen saǵat 4:10-da attandyq».

Ýnıversıtet jastarynan quralǵan 14 adam Aqbet shyńyna 1 saǵat 50 mınýtta jetken. Bıik núktege taý jolymen joǵary kóterilip jáne qaıta tómen túsý úshin 3 saǵat 30 mınýt jumsaǵan.

«Bul shyńdy baǵyndyrýǵa shyqqan jastar - elimizdiń túrli óńirinen kelgen ýnıversıtet qyzmetkerleri, - deıdi Ǵabıt Hafız. - Arasynda Ertis óńiriniń keremetterimen tanyspaǵandary da bar. Sondyqtan Ertis-Baıannyń kórkem jerlerin kórsetý jáne ózgelerge de tanystyrý maqsatynda elorda kúnine oraı shyńdy baǵyndyrýǵa bel baıladyq. Ári ishki týrızmdi damytýǵa, salaýatty ómir saltyn ustanýǵa at salysamyz».

Jastar departamenti basshysynyń aıtýynsha, taý shyńyn baǵyndyrý barysynda eshkim jaraqat alǵan joq.