Ertis sýy jasyl reńge boıalýyna baılanysty ekologtar synama aldy

PAVLODAR. QazAqparat - Pavlodar oblysy boıynsha ekologııa departamentiniń mamandary «Qazgıdromet» RMK fılıaly qyzmetkerlerimen birge Mıchýrıno aýylyna baryp, hımııalyq synama aldy. Buǵan deıin áleýmettik jelilerde Ertis ózeniniń túsi jasyl reńge boıalǵany jaıly aqparat taraǵan edi, dep habarlaıdy QazAqparat.

Aıta ketý kerek, áleýmettik jelilerdegi vıdeo túsirilgen jer - ózenniń ózi emes, Ertis ózeniniń tarmaǵy bolyp tabylady.

Bul jerdegi sý aǵyndy emes. Sý qoımasyndaǵy sýdyń temperatýrasy - 28 0S.

«Qazir qurǵaq kezeń jáne jaýyn-shashyn joq. Sonymen qatar joǵary temperatýra men býlanýdyń edáýir mólsheri osyndaı taıaz sý obektileriniń batpaqtanýyna sebep bolady. Sýdyń «jasyldanýynyń» sebebi joǵaryda atalǵan faktorlar dep sanaımyz» deıdi ekologtar.

Ekologııa departamenti men «Qazgıdromet» RMK fılıalynyń zerthanalary kýálandyrý úshin lastaýshy zattardy anyqtaý maqsatynda sýdy taldaýdan ótkizedi.

Júrgizilgen zertteý nátıjesi boıynsha tıisti shara qabyldanady.