Ertis ózeninen 3,4 mln teńgeniń bekire balyǵyn aýlaǵan brakoner ustaldy

PAVLODAR. QazAqparat - Ertis ózeninen bekire balyǵyn aýlaǵan brakoner ustaldy, dep habarlaıdy QazAqparat Ekologııa, geologııa jáne tabıǵı resýrstar mınıstrliginiń Telegram paraqshasyna silteme jasap.

Balyq sharýashylyǵy komıtetiniń Zaısan-Ertis oblysaralyq basseındik balyq sharýashylyǵy ınspektsııasynyń qyzmetkerleri Pavlodar oblysynyń Maı aýdanynda Ertis ózeniniń «Belaıa» aǵynynda reıd júrgizgen.

Onyń barysynda 27 shilde saǵat 22.30-da «Vıhr-25» aspaly motory bar «Kazanka» qaıyǵynda tormen zańsyz balyq aýlaǵan S. atty azamat ustaldy.

Kemeni qaraǵan kezde bekire tuqymdas balyqtar tabyldy. Onyń ishinde salmaǵy 4 kg 1 sibir bekiresi jáne jalpy salmaǵy 8.8 kg 14 dana sterlet bar.

Balyq resýrstaryna kelgen zalal 3 469 771 teńgeni qurady.

Janýarlardyń sırek kezdesetin jáne quryp ketý qaýpi tóngen túrlerin aýlaǵandarǵa QR QK 339-babynda jaýapkershilik kózdelgen.

Ol úshin úsh jyldan jeti jylǵa deıin bas bostandyǵynan aıyrý jazasy bar.

Osyǵan baılanysty oqıǵa ornyna Pavlodar oblysy Maı aýdandyq polıtsııa bóliminiń jedel-tergeý toby shaqyrylyp, materıaldar qylmystyq is qozǵaý úshin berildi.

Atalǵan fakti Balyq sharýashylyǵy komıtetiniń baqylaýynda.