«Ertis ormany» rezervatynda 850 ga jer órtendi

ASTANA. QazAqparat – Pavlodar oblysyndaǵy órtke baılanysty jedel shtab qurylyp, ózge aımaqtardan mamandar men tehnıka tartylyp jatyr. Bul týraly QR TJM Daǵdarys jaǵdaılarynda basqarý ortalyǵy kezekshi bóliminiń bastyǵy Eldor Raıymbekov málim etti, dep habarlaıdy QazAqparat tilshisi.

«2023 jylǵy 15 shildede Pavlodar oblysyndaǵy órt boıynsha daǵdarys ortalyǵynda jedel shtab quryldy. Bul jerde kelip túsken sońǵy aqparatqa taldaý jasalady. Tótenshe jaǵdaılar mınıstri men oblys ákimi órt aýmaǵyn tikushaqpen baqylaý jasady. Órttiń aýqymy 850 gektardy qurap otyr. Tilsiz jaýmen kúreske Astana qalasynan, ShQO jáne Qaraǵandy oblysynan qosymsha kúsh jumyldyryldy», - dedi Eldor Raıymbekov.

Onyń málimetinshe, «Ertis ormany» rezervatyndaǵy órtti sóndirýge 300-den astam maman jáne 100-den astam arnaıy tehnıka jumyldyryldy.

«Sonymen qatar 5 tikushaq órt sóndirip jatyr, olar osy kezge deıin 22 ret (66 tonna) sý shashty. Jalynnyń aldyn alý jáne joıý maqsatynda komandalyq shtat quryldy. Órt týraly kosmomonıtorıng arqyly da aqparat jınalyp jatyr», - deıdi ol.

Buǵan deıin «Ertis ormany» rezervatynda órt shyqqany týraly habarlaǵan edik.

QR Tótenshe jaǵdaılar mınıstrligi baspasóz qyzmetiniń habarlaýynsha, 15 shilde kúni Sharbaqty aýdanynyń Stepnoe jáne Baýyrtal ormanshylyqtarynda ormannan órt shyqty.

Sondaı-aq, mınıstr Syrym Sháriphanov jaǵdaıdyń baqylaýda ekenin aıtyp ótti.