Ertis ormany men Kókshetaý parkinde orman órtterin erte anyqtaý júıesi ornatylady
«Tájirıbe kórsetkendeı, orman órtterin erte anyqtaý úlken mańyzǵa ıe. Búgingi tańda orman órtterin erte anyqtaý júıesi «Býrabaı» memlekettik ulttyq tabıǵı parkinde jáne «Semeı ormany» memlekettik ulttyq tabıǵı parkiniń 3 fılıalynda ornatylǵan. Sonymen qatar, ormandy zańsyz kesý jaǵdaılaryn azaıtý, orman kúzetiniń keshendi qaýipsizdigi jáne memlekettik orman qoryna kelýshiler úshin orman órtterin erte anyqtaý júıesin ornatý da mańyzdy. Bıyl «Ertis ormany» jáne «Kókshetaý» memlekettik ulttyq tabıǵı parkinde orman órtterin erte anyqtaý júıesin ornatý josparlanǵan», - dedi Úkimet basshysy jaýabynda.
Onyń atap ótýinshe, shaǵyn alańdarda orman órtterin ýaqtyly anyqtaý jáne joıý maqsatynda «Qazavıaormanqorǵaý» RMQK Ekologııa jáne tabıǵı resýrstar mınıstrliginiń kúshterimen respýblıkanyń 10 oblysynda (Almaty, Jetisý, Aqmola, Shyǵys Qazaqstan, Abaı, Jambyl, Qaraǵandy, Soltústik Qazaqstan («Kókshetaý» MUTP), Qostanaı jáne Pavlodar oblystarynda) 8 mln 869 myń gektar alańda nemese respýblıkanyń memlekettik orman qory aýmaǵynyń 30 paıyzynda avıatasymaldaý júzege asyrylady. Normatıvtik ushý 9024 saǵatty quraıdy.
«Tabıǵat qorǵaý jáne orman mekemeleri qyzmetkerleriniń orman órtin sóndirý stantsııalarynda jáne órt-baqylaý munaralarynda kezekshiligi olardyń órt qaýpi joǵary kezeńderde táýlik boıy kezekshilikke ótýin qamtamasyz ete otyryp uıymdastyrylady. Jalpy, búgingi kúni orman órtteriniń ǵaryshtyq monıtorıngi júıesin «Qazaqstan Ǵarysh Sapary» Ulttyq kompanııasy» AQ shtattyq rejımde júzege asyrady», - dedi Álıhan Smaıylov.