Ertis óńiriniń 20 qarııasy bata berýden synǵa tústi
Baıqaýdyń maqsaty - bata berý dástúrin qazaq halqynyń ulttyq qundylyqtarynyń biri retinde keıingi urpaqqa úlgi etý, halyq shyǵarmashylyǵyn nasıhattaý.
Oblys ákiminiń orynbasary Meıram Begentaev baıqaýdy uıymdastyrýshylarǵa alǵys bildirdi. «Bata berý dástúriniń tárbıelik mańyzy óte zor. Búgingi is-shara halqymyzdyń ulttyq sana-sezimin jańǵyrýyna úlken kómek kórsetedi» dedi Meıram Begentaev. «Qurmetti qarııalar, sizderdiń bergen batalaryńyz Jastar jyly aıasynda óte mańyzdy, jastar sizderderden úlgi-ónege alýlary kerek. Bergen batalaryńyz qabyl bolsyn».
Іs-sharany uıymdastyrǵan uıym - oblystyq ardagerler keńesi tóraǵasynyń orynbasary Abylaı Jantórınniń aıtýynsha, baıqaý tuńǵysh ret ótkizilip otyr jáne bul respýblıkalyq saıysqa irikteý kezeńi bolyp esepteledi.
«Búgin óńirdiń barlyq qalalary men aýdandarynan 20 batagóı aqsaqal qatysýda. Qazylar alqasyna óńirimizdiń belgili aqyn-jazýshy, jýrnalısterimiz ben qoǵam qaıratkerlerin shaqyrdyq. Sol kisilerdiń kómegimen anyqtalǵan baıqaý jeńimpazdary naýryzda Astanada ótetin respýblıkalyq saıysqa joldama alady. Sonymen birge búgingi júldegerlerimizge syılyqtarymyz da bar»,- dedi Abylaı Jantórın.
Qazylar alqasyna engen Máshhúr Júsip ortalyq meshitiniń bas ımamy Joldas Qospaqulynyń sózinshe, jasy úlken adamdardan bata alý - salt-dástúrimizge, sharıǵatqa saı uǵym. Bata uǵymy kóptegen halyqtarda bar bolǵanymen, qazaq halqynda erekshe orynǵa ıe bolǵan.
Konkýrs nátıjeleri boıynsha bas júldeni pavlodarlyq Baltabaı Syzdyqov utyp aldy. Birinshi oryn ekibastuzdyq Saılaý Baıbosynǵa buıyrsa, ekinshi oryndy Beısenbi Muqajanov pen Baqytjamal Eleýkenova ıelendi. 18 qatysýshy arnaýly júldege ıe boldy.