Erteńine eleńdegen azamattar Baýyrjan Momyshulynyń rýhymen rýhtanǵanda ǵana, elimizdiń Máńgilik el bolýyna qyzmet ete alady - B. Smaǵul
«Biz Baýyrjandaı birtýar batyrdyń rýhymen árýaqytta rýhtanýǵa tıistimiz. Máńgilik eldiń jolynda eldik pen erlikti qosqanda ǵana baryp, qadamymyz árqashanda nyq bolady. Eldiń rýhyn, namysyn kóterý jolynda osyndaı batyrlarymyzdyń ónegeli ómirin jastarǵa sabaq etýimiz kerek. Sondyqtan da áskerı ant qabyldaıtyn azamattar árqashanda Baýyrjanshyl bolyp, otanshyldyq ilimimen sýsyndaýǵa tıisti. Al ıyǵyna pogon taqqan azamattarymyz shen úshin emes el úshin, marapat úshin emes parasat úshin qyzmet etýge mindetti. Bizge ulttyq rýhy laılanbaǵan, bodan bolmaǵan, ýlanbaǵan sana kerek. Ol kimde bar? Ol Baýyrjanda bar. Al Baýyrjanshyl azamattar eń aldyńǵy qatarda júrýi tıis. Ekinshi bolý sizderge jazbaǵan», - dedi B. Smaǵul.
Baýyrjan Momyshulyna arnalǵan eskertkish-músinniń saltanatty ashylý rásimine osy oqý ornynyń basshylyǵy men tárbıelenýshileri, sonymen qatar, QR Parlamenti Májilisiniń depýtaty, Aýǵan soǵysynyń ardageri Baqytbek Smaǵul, áskerı qaıratker, otstavkadaǵy polkovnık Kım Serikbaev, Almaty qalalyq Tilderdi damytý, muraǵattar jáne qujattama basqarmasynyń basshysy Mamaı Ahetov, Baýyrjan Momyshulynyń kelini, jazýshy Zeınep Ahmetova jáne nemeresi Erjan Momyshuly, belgili aqyn Maraltaı Raıymbekuly jáne basqa da áskerı qaıratkerler, zııaly qaýym ókilderi, sondaı-aq mektep tárbıelenýshileriniń ata-analary qatysty.
Búgingi merekelik shara aıasynda mektep-ınternat tárbıelenýshileriniń qatysýymen osy oqý ornynda taıaýda ashylǵan ulttyq at sporty kavalerııasynyń tusaýy kesildi jáne bıyl oqýǵa qabyldanǵan jas tárbıelenýshiler Baýyrjan Momyshulynyń eskertkish-músini aldynda ant qabyldady.
Aıta ketelik, bul eskertkish-músin Aýǵan soǵysy ardagerleriniń tikeleı atsalysýy arqasynda ornatyldy. Bul ıgi sharaǵa QR Bilim jáne ǵylym mınıstrligi men Mádenıet jáne sport mınıstrligi jáne Almaty qalasynyń ákimdigi qoldaý kórsetti.