Erteń Túrkııada prezıdent saılaýynyń sheshýshi kezeńi ótedi

ASTANA. QazAqparat – Erteń Túrkııada prezıdent saılaýynyń ekinshi kezeńi ótedi. Osylaısha eldiń 13-prezıdenti kim bolatyny anyqtalady, dep habarlaıdy QazAqparat tilshisi.

Saılaýdyń 14 mamyrda ótken alǵashqy týrynda 4 kandıdat baq synasqan bolatyn.

Olar: qazirgi prezıdent Rejep Taıyp Erdoǵan, oppozıtsıonerler Kemal Qylyshdaroǵly, Muharrem Inje jána Sınan Oǵan.

Degenmen negizgi báseke bılik partııasynyń atynan synǵa túsip jatqan Rejep Taıyp Erdoǵan men eldegi negizgi oppozıtsııalyq kúsh sanalatyn «Respýblıkalyq halyq partııasynyń» tóraǵasy Kemal Qylyshdaroǵly arasynda ótip jatyr.

Bılik jaǵyndaǵy Halyq koalıtsııasyna «Ádildik jáne damý partııasy», «Ultshyl qozǵalys partııasy» men «Uly birlik» partııasy birikken.

Qazirgi prezıdent R. Erdoǵannyń kandıdatýrasyn usynǵan osy koalıtsııa.

Al oppozıtsııalyq baǵyttaǵy «Ulttyq alıans» quramyna Respýblıkalyq halyq partııasynan bólek «Jaqsy» partııasy, «Baqyt» partııasy men «Demokratııalyq partııa» kirip otyr.

Oppozıtsııalyq kúshterge «Bolashaq partııasy» men «Demokratııa jáne progerss partııasy» da qoldaý kórsetip keledi.

Osylaısha qazirgi prezıdenttiń basty qarsylasy K.Qylyshdaroǵly 6 partııanyń usynýymen saılaýǵa aralasqan.

14 mamyrdaǵy saılaý aıqyn jeńimpazdy anyqtaı almaǵan. Kósh basyndaǵy eki úmitker daýys berýshilerdiń 50 paıyzdan astam daýysyn jınaı almaı qalǵan edi.

Al qalǵan kandıdattar bul ekeýdiń qarqynyna ilese almaǵan. Onyń ústine M.Inje 11 mamyrda-aq eldiń tynyshtyǵy úshin óz kandıdatýrasyn keri qaıtaryp alatynyn málimdegen bolatyn.

Birinshi kezeńde halyqtyń 5%-dan astam ǵana daýsyn jınaǵan S.Oǵan saılaýshylardy ekinshi kezeńde R. Erdoǵanǵa qoldaý kórsetýge shaqyrdy.

Jalpy eldegi kóptegen reıtıng júrgizetin kompanııa qazirgi bılikke oppozıtsııalyq baǵyttaǵy «Ulttyq koalıtsııanyń» úmitkeri Kemal Qylyshdaroǵlynyń jeńiske jetýge múmkindigi mol ekenin aıtyp otyr.

Olardyń málimeti boıynsha, saılaýshylardyń shamamen 53% astamy atatúrikshilerdi qoldaýǵa, qalǵan bóligi R. Erdoǵandy qoldaýǵa daıyn.

Al 14 mamyrdaǵy saılaýdyń resmı qorytyndysy halyq senimi qazirgi prezıdentke degen senimin joǵaltpaǵanyn kórsetti.

Birinshi týrda R. Erdoǵan 49,34%, al K. Qylyshdaroǵly 45% daýys jınaǵan bolatyn.

14 mamyrdan keıin eldegi saılaý naýqany toqtaǵan joq. Qala kóshelerinde eki kandıdattyń úgit-nasıhaty áli júrip jatyr.

Paraqsha taratyp, dańǵyldarda daýys zoraıtqyshpen uran tastaýshylar jıi kózge shalynady.

Erteń, ıaǵnı, 28 mamyrda Túrkııanyń 13-shi prezıdenti kim bolatyny aıqyndalady.

Osylaısha Túrkııa Respýblıkasy óz tarıhynyń ekinshi ǵasyryna kimniń basshylyǵymen qadam basatyny belgili bolmaq.