Erteń merzimdi áskerı qyzmet sarbazdarynyń Ant qabyldaý rásimi bolady
«Aıbyn» prezıdenttik polki (Astana q.) áskerı qyzmetshileriniń Áskerı ant qabyldaý rásimi Astana qalasyndaǵy «Otan qorǵaýshylar» monýmenti janyndaǵy alańda ótedi. Al «Batyr» prezıdenttik polki (Almaty q.) sarbazdarynyń osyndaı saltanaty Almaty qalasyndaǵy 28 gvardııashy-panfılovshylar saıabaǵynda bolady. Áskerı ant qabyldaý saltanatyna jas sarbazdardyń ata-analary men jaqyndary qatysady.
QR MKQ qataryndaǵy 2023 jylǵy kúzgi shaqyrylym boıynsha merzimdi áskerı qyzmet sarbazdary elimizdiń barlyq aımaqtary men respýblıkalyq mańyzy bar qalalarynan iriktelip alynǵan. Áskerı ant qabyldaý qarsańynda olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıyndaý kýrsynan ótti.
Áskerı ant qabyldaý saltanaty – erekshe jaýyngerlik rásimderdiń biri. Ant qabyldaý arqyly sarbazdar ózderine Otandy qorǵaýǵa, áskerı qyzmet mindetterin adal atqarýǵa, áskerı isti yntamen meńgerýge, senip tapsyrylǵan qarý men tehnıkany durys qoldaný men saqtaýǵa jaýapkershilik alady.
Áskerı ant qabyldaǵan soń merzimdi qyzmet sarbazdary QR MKQ Aıryqsha maqsattaǵy kúshteri atqaratyn: Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarýǵa kirisedi.
QR Memlekettik kúzet qyzmeti Aıryqsha maqsattaǵy kúshteriniń merzimdi áskerı qyzmet sarbazdary qataryna elimizdiń 18 ben 27 jas aralyǵyndaǵy, boıy 180 sm-den joǵary jáne 195 sm-den aspaıtyn, bilimi orta bilimnen tómen emes, densaýlyǵy jaqsy kez kelgen azamaty qosyla alady. Joǵary bilimdi, sporttyq jetistikteri men razrıadtary bar úmitkerlerge basymdyq beriledi.
Merzimdi áskerı qyzmetti QR Memlekettik kúzet qyzmeti qatarynda atqarý jas azamattar úshin myqty erlik mektebi bolady. Olar munda óziniń ómirlik jolyna qajetti mańyzdy daǵdylarǵa úırenedi. Jastar úshin bul kezeń ary qaraıǵy mansap jolyn jalǵastyrýǵa negiz, áleýmettik lıft bolýy múmkin. Merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alady. Ary qaraı olardyń arnaýly memlekettik organnyń qyzmetkeri jáne ofıtseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar.