Erteń baspana máselesine qatysty jaqsy jańalyq aıtylady - Qaıyrbek Óskenbaev
Sessııa kezinde óńirlerden kelgen delegattar baspana máselesin kóterdi. Atap aıtqanda, páter kezeginde turǵan azamattardy baspanamen qamtamasyz etýge qatysty suraqtar qoıyldy. QR Indýstrııa jáne ınfraqurylymdyq damý vıtse-mınıstri Qaıyrbek Óskenbaevtyń aıtýynsha, erteńgi sezde baspana máselesin sheshýge qatysty birqatar jańalyqtar aıtylady.
«Erteń sezde de osy másele kóteriledi. Sol kezde jaqsy xabar estısizder. Qansha qarajat bólinip, qansha adamnyń baspana máselesi sheshiletini aıtylady», - dedi Q.Óskenbaev memlekettik qyzmettiń jańa formatyn qalyptastyrýǵa arnalǵan paneldik sessııada.
QazAqparat tilshisi vıtse-mınıstrden jaǵymdy jańalyqqa qatysty aqparatpen bólisýdi surady. Alaıda Q.Óskenbaev: «Prezıdenttiń ózi aıtady», - dep qysqa ǵana qaıyrdy.
Aıta keteıik, QR Indýstrııa jáne ınfraqurylymdyq damý mınıstrligi barlyq qazaqstandyqtardy baspanamen qamtýǵa qajetti qarajattyń somasyn jarııalady.
«487 myń adamnyń máselesi birjola sheshýge, dál qazir 4 trıllıon 887 mıllıard teńge kerek bolyp tur. Onyń ınfraqurylymy 20 paıyz. Sonda kezekti turǵan azamattardyń baspana máselesin birden sheshý úshin respýblıkalyq nemese jergilikti bıýdjetten 6 trıllıon teńgedeı aqshany qazir qolma-qol jumsaý qajet», - deıdi Q.Óskenbaev.