Ertegidegideı ómir súrip jatyrmyz: Jetisaıda balyq aýlaýdy kásip etken kelinshek turady

TÚRKІSTAN. QazAqparat – Túrkistan oblysy Jetisaı aýdanynyń turǵyny Elmıra Tóleevany jerlesteri «balyqshy kelinshek» dep ataıdy. Sebebi, aýyl mektebinde bastaýysh synyp oqýshylaryna sabaq beretin ustaz balyq aýlaýdy qosymsha kásip etken. Ári balyq etinen kóptegen tamaq túrlerin jasap, tabys taýyp júr.

Elmıra Qanaıqyzy Jetisaı aýdany Shablan Dildábekov aýyldyq okrýginde turady.

Kúndelikti keshkisin joldasymen birge qaıyqqa minip, qarmaqpen balyq aýlaý úırenshikti isi. Kólge ár barǵan saıyn 5,6 balyqtan alyp keledi.

Al, úıge kelgen soń, balyqtan túrli tamaq túrlerin daıyndap, as ázirleıdi.

Salat jasap, káýap pisiredi. Bala-shaǵadan artylǵanyn aýdan aýmaǵynda saýdaǵa shyǵaryp, satady.

Osylaısha shaǵyn kásipke aınalǵan kúndelikti sharýa úıdiń shyǵynyn jaýyp, mol tabysqa keneltip otyr.

«Oramaldy taǵyp, arnaıy formany kıip, qaıyqty kólikke artamyz. Uzyn etikte ózime jarasa ketedi. Sodan kólge baryp, balyq aýlaımyz. Keı kúnderi shelegimizdiń bos qaıtatyn kezderi de bar. Mundaı sátte esh qamyqpaımyn. Qaıta kelesi kúni kópteý balyq túsip jatady. Barlyǵy nesibemiz ǵoı» - deıdi ol.

Elmıranyń eń úlken oljasy jaıyn balyǵy bolǵan. Ony jaǵadan baıqaǵan joldasy ekeýi qýalap júrip, qolmen ustap alypty.

Tarazyǵa salyp ólshegende 44 keli shyqqan. Al, qarmaqqa ilinetinderi sazan, sýdak, qaras eken.

«Bıyl Baqytjanmen otandasqanyma 14 jyl boldy. Alǵash kelin bolyp túskende balyq týraly múldem bilmeıtinmin, qyzyqpaıtyn da edim. Joldasym janyna ertip júrip, balyq aýlaýdy úıretti. Ertegi keıipkerleri sekildi ekeýimiz qarmaǵymyzdy alyp, kúnde qaıyqqa minip ketetinbiz. Qazir balyqtyń attaryn jatqa bilemin. Ári onnan astam tamaqtyń túrin daıyndaı alamyn» - deıdi ol.

Elmıra árdaıym dastarhanyn balyqtan jasalǵan taǵamǵa toltyryp qoıady. Ettiń ornyna balyq asyp, káýapqa deıin balyqtan jasaıdy. Sorpasy men salaty, samsasy da daıyn.

Al, artylǵanyn saýdaǵa shyǵarady. Dúkenderge ótkizedi. Toı jasaıtyndardyń tapsyrysyn oryndap beredi.

«Menen kóbinese balyqtyń sorpasyn, «he» degen salatyn, buqtyrma taǵamdaryn suraıdy. Balyqty tandyrǵa, qazanǵa, jeroshaqqa pisiremin. Tıisinshe, árqaısysynyń dámi ártúrli bolady», – deıdi ol.

Balyqshy kelinshektiń 2 ul, 2 qyzy bar. Olar da balyq taǵamdaryna úıir. «Jalyqtyq, basqa taǵam ázirle» degen áńgime bolmaıdy bul úıde.

Tipti, qyltanaqtaryn da ózderi alyp, qaýipsiz etip jeýge daǵdylanǵan.

Al, úıdiń qasyndaǵy kórshi bolyp turatyn ata-enesi de kelini daıyndaǵan balyqtan jasalǵan taǵamdardy súısine jeıdi.

«Et te jeımiz. Biraq balyqty kóp tutynamyz. Balyqta dárýmender kóp. Bilgen adamǵa balyqtyń paıdasy jeterlik. Únemi tutynatyndyqtan bolar balalarymnyń densaýlyǵy jaqsy. Balyq jegenniń arqasy shyǵar, qudaıǵa shúkir balalarymnyń eshqaısysynda dısplazııa sekildi aýrýlar bolmaǵan. Múldem aýyrmaǵan, ózim de eshqandaı ýkol saldyrmaǵanmyn. «Jurt balań bar, sabaǵyń bar, qalaı úlgeresiń?» dep surap jatady. Áıel adam barlyǵyna úlgerý kerek. Sebebi, nıet bolsa bárin retteýge bolady»,- deıdi ol.

Búginde Elmıra ınstagramm paraqshasy arqyly balyqtan jasalǵan taǵamdardy daıyndaý boıynsha master klastar ótip júr.

«Balyqshynyń kelinshegi» dep atalatyn paraqshasynyń da oqyrmany kóbeıip keledi.

Áleýmettik jeliden aqsha taba bastaǵanyn kórgen joldasy balyq satýdan túsken qarajatty jınap, sońǵy úlgidegi «iphone 13» markaly telefon alyp bergen.

«Alǵashqy kezdegi telefonym qatyp qala beretin edi. Eski bolǵandyqtan, ǵalamtorǵa kirip shyǵýda qıyndyq týdyratyn. Sony baıqaǵan joldasym mereke qarsańynda jańa telefon syılady. Úlken rahmetimdi aıtamyn. Sondaı-aq, Baqytjandy balyqtan tabys tabýǵa úıretken ustazym dep bilemin. Birge júrip tynymsyz eńbek ettik. Úı saldyq, alǵan nesıelerimizdi japtyq. Búgin, mine, sol eńbektiń jemisin kórip otyrmyz», – deıdi balyqshy kelinshek.