Ersultan Bekturǵanov: Teńdesi joq jetistik

NUR-SULTAN. QazAqparat – Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń búgingi «Táýelsizdik taǵylymy» atty maqalasy kimdi bolsa da beı-jaı qaldyrmaıtyny, tolǵandyratyny, oıyna oı qosatyny sózsiz. Óıtkeni osy bir maqalada búkil qazaqtyń júzdegen jyldyq tarıhy qamtylyp, ata-babalarymyz ańsap, armandap ótken Táýelsizdikke qalaı jetkenimiz, onyń Temirqazyǵyn qalaısha berik bekemdegenimiz týraly keńinen aıtylyp, kórsetilgen. Osyndaı pikirdi Qazaqstan Respýblıkasy Tuńǵysh Prezıdenti – Elbasy Kitaphanasynyń Arnaıy jobalar qyzmetiniń jetekshisi Ersultan Bekturǵanov bildirdi. QazAqparat sarapshy pikirin sol qalpynda usynady.

***

Elbasy halqymyz úshin asa qasterli osy uǵymnyń mán-maǵynasyn aıta kele: «Ol – ata-babalarymyzdyń azattyq jolyndaǵy jan alysyp, jan berisken san ǵasyrlyq kúresiniń zańdy jalǵasy, halyqaralyq qujattarmen bekitilip, máńgilikke berilgen syıy», – dep tujyrymdaǵan. Shynynda da Táýelsizdik álemdegi kóptegen ulttardyń asyl armany, jeteıin dese jete almaı júrgen asqaq shyńy. Qazirgi tańda Jer sharynda 5 myńnan astam tilde sóıleıtin halyqtar bar, biraq solardyń eki júzge jýyǵy ǵana óz Táýelsizdigin alǵan, Týy, Eltańbasy, Ánurany, astanasy bar egemen memleketter.

Atalǵan maqalada ótken otyz jyl ishinde táýelsizdigimizdi tuǵyrly etý jolynda atqarylǵan qyrýar ister, onyń ishinde kezdesken qıyndyqtardyń qalaısha eńserilgeni jáne jetken ulan-ǵaıyr jetistikter baıyppen baıandalǵan.

Osy kezeńde birshama ýaqyt Prezıdent Ákimshiliginiń kadr saıasaty qurylymynda qyzmet atqarǵandyqtan osy saladaǵy talaı ózgerister men jańalyqtarǵa kýá boldym. Elbasynyń basshylyǵymen qolǵa alynǵan alǵashqy irgeli reformalardyń ishinde kadr saıasatynda júrgizilgen túbegeıli ózgerister memlekettik qyzmetti múldem jańa, joǵary deńgeıge kóterdi dep tolyq aıta alamyz. TMD memleketteriniń ishinde tuńǵysh bolyp, álemdik ozyq tájirıbelerdi saraptap, elimizdiń erekshelikterin eskere otyryp ázirlengen «Memlekettik qyzmet týraly» birinshi zań 1995 jyly qabyldandy. Keıinnen bul salada elimizdegi qoǵamdyq, áleýmettik, ekonomıkalyq ózgerister men strategııalyq qujattardyń talabyna saı keletin eki jańa zań qabyldanyp, olarǵa birneshe ret ózgerister engizildi.

1993 jyly Prezıdenttiń álemde teńdesi joq «Bolashaq» halyqaralyq baǵdarlamasy qabyldanyp, osy joba aıasynda on bes myńnan astam jas túlekterimiz shet elderdiń ozyq oqý oryndarynda bilim alyp, el ekonomıkasyna asa qajetti mamandyqtardy meńgerip shyqty, olar búgingi kúni elimizdiń memlekettik qurylymdarynda ǵana emes, ekonomıkanyń barlyq salalarynda qajyrly eńbek etýde.

Elbasy qaı baǵytta bolmasyn jańa strategııalyq jobalardy, baǵdarlamalardy bastaǵanda árdaıym bıik maqsat pen bıik talapty alǵa qoıady. Sonyń ishinde memleketimizdiń astanasyn Almatydan Saryarqa tórindegi Aqmola qalasyna kóshirý jónindegi batyl sheshimi, sol uly kóshtiń kýási retinde, meni áli kúnge deıin tań qaldyryp keledi. Óıtkeni, birinshiden, jyldar boıy qalyptasyp, turaqtanǵan, otyryqshy kadrlardy jańa qonysqa kóshirip ákelip, ornalastyrý, ekinshiden, qysqartylyp, yqshamdalǵan memlekettik organdardyń apparatyna jańa elordada qyzmetkerler daıarlaý, olardy qyzmetke taǵaıyndaý máselesi úlken yjdaǵattylyq pen kóregendikti talap etetin aýqymdy jumys. Sol kezde Úkimettiń ortalyq organdardy kóshirý jóninde daıyndaǵan buryn qabyldaǵan sheshimin ózgertip, Astanaǵa búkil Qazaqstannyń barsha óńirinen kadrlar shaqyrýdy buıyryp, olardyń barlyǵyna birdeı jaǵdaı jasaýǵa tapsyrma berip, ony óziniń jeke baqylaýynda ustady. Jalpy, Tuńǵysh Prezıdentimiz taǵaıyndaǵan, ósirgen saıası memlekettik tulǵalardyń, dıplomattardyń, ol júrgizgen sarabdal kadr saıasatynyń arqasynda memlekettik qyzmette bolyp, eńbek etken azamattardyń elimizdiń áleýmettik, ekonomıkalyq damýyna, memleketimizdiń halyqaralyq bedeliniń ósirýine, táýelsizdigimizdi nyǵaıtýǵa qosqan úlesi erekshe desek, artyq aıtqan bolmas edik.

Buǵan aıryqsha aıǵaq retinde Nursultan Ábishuly Nazarbaevtyń óz maqalasynda: «Otyz jylǵa jýyq el basqarǵan kezimde men janyma qanshama azamatty serik etip, kóptegen shákirt tárbıeledim. Solardyń ishinde Úkimet basqarǵan, Birikken Ulttar Uıymy Bas hatshysynyń orynbasary retinde jahandyq saıasatqa jetiktigin tanytqan, táýelsizdiktiń alǵashqy jyldarynan bastap qasymnan tabylǵan naǵyz patrıot, joǵary bilikti kásipqoı tulǵa Qasym-Jomart Kemeluly Toqaevty Prezıdenttik qyzmetke usyndym» degen sózin mysal retinde keltirýge bolady.

Elbasymyz Táýelsizdiktiń birinshi kúninen bastap barlyq ýaqytta atqarylyp kele jatqan ıgi isterdiń, jańalyqtardyń, jasalyp jatqan jaqsylyqtardyń bári óskeleń urpaq úshin, jastar úshin dep aıtyp júredi.

Shynynda da osy otyz jyl ishinde dúnıege kelgen jastardyń ózi búgingi tańda saıası qyzmetterde, basqarý júıelerinde, máslıhattarda, qoǵamdyq uıymdar men ekonomıkanyń barlyq salalarynda belsendi eńbek etip, elimizdiń damýyna laıyqty úlesterin qosýda.

Osyndaı tuǵyry berik Táýelsizdigimizdiń kók týy qashanda bıikte jelbirep, tatý-tátti ómir súrip otyrǵan, birligi jarasqan halqymyzdyń bolashaǵy árdaıym jarqyn bola beretinine kámil senemiz!

Elimiz – tynysh, jurtymyz – aman, egemendigimiz baıandy bolǵaı!