Bapı jýrnalıst Aıdos Sadyqovqa jasalǵan qastandyq jaıly: Munyń artynda eski Qazaqstan turýy múmkin

<p>ASTANA. KAZINFORM — Májilis depýtaty Ermurat Bapı Kıevte qazaqstandyq jýrnalıst Aıdos Sadyqovqa qastandyq jasalýyna oraı pikir bildirdi.</p>

«Aıdos pen Natalıa Sadyqovtarmen tanyspyn, tyǵyz baılanysta boldyq. Olar — kásibı jýrnalıster. Qastandyqqa qatysty nusqaǵa oraı aıtar bolsam, bul — baryp turǵan arandatýshylyq. Bizdiń keıbir ınternet resýrstar bul oqıǵanyń tasasynda Qazaqstan bıligi tur degen dolbar jasaıdy. Qazaqstan bıligine mundaı topastyqty uıymdastyrýdyń qajeti qansha? Bul qaı jaǵynan alyp qarasaq ta tıimsiz, logıkaǵa syımaıdy. Munyń tasasynda eski Qazaqstannyń ókilderi nemese Qazaqstandy máselen Reseımen, ózge memleketpen, múmkin Ýkraınamen qaqtyǵystyrǵysy keletin úshinshi kúshter turýy múmkin. ıAǵnı, túrli nusqa bar», — dedi ol Parlament palatalarynyń birlesken otyrysynan keıin.

Sonymen qatar depýtat bul isti Memleket basshysy baqylaýyna alǵanyn atap ótti.

«Tergeý júrip jatyr. Qazir qandaı da bir joramal jasamaı tura turaıyq. Menińshe, bir-eki kúnniń ishinde Bas prokýratýra naqty mán-jaıdy anyqtap, jarııa eter», — dedi Ermurat Bapı. 

Buǵan deıin Prezıdent Qasym-Jomart Toqaev ta Kıevte jasalǵan qastandyq jaıynda pikir bildirgen edi.

Prezıdent keńesshisi Berik Ýálıdiń aıtýynsha, Qazaqstandy aıyptaý keıbir kúshterge tıimdi.

Búgin Іshki ister mınıstrligi Aıdos Sadyqovty atty degen kúdiktiniń Qazaqstan polıtsııasynda jumys istemeıtinin habarlady.

Memleket basshysy qastandyqty tergeý amaldaryn jiti baqylap otyr.