Ermurat Bapı Ulttyq qordan bankterge berilgen qaryz máselesin kóterdi

<p>Ulttyq qordan saýyqtyrý úshin bankterge berilgen qaryzdy qaıtarýdy talap etý kerek. Bul týraly Májiliste &laquo;Halyqtyń shamadan tys kredıt alýyn azaıtý jáne qarjylyq saýattylyqty arttyrý&raquo; taqyrybyndaǵy Parlament tyńdaýynda Ermurat Bapı aıtty, dep habarlaıdy Kazinform.</p>

«Halyqtyń qaryzy boıynsha eki máseleni kótermekpin. Birinshiden, «eski Qazaqstannyń» halyq aldyndaǵy qaryzyn nege izdemeısizder? Saýyqtyramyz dep Ulttyq qordan bankterge berilgen trıllıondaǵan teńge qaryzdy qaıtarýdy nege talap etpeısizder? Saýyqtyramyz dep kezinde olarǵa aqsha aýdaryldy ǵoı», - dedi E. Bapı Bas prokýratýra ókilderine qarata aıtqan sózinde.

Onyń paıymynsha, birneshe bankti biriktirip, qyrýar saýyqtyrý qarjysyn bir bankke jınastyryp, onyń barlyǵyn alyp ketken olıgarhtarǵa tıesili bankterdiń qaryzyn izdeý kerek.

«Eger sol trıllıondar qaıtarylatyn bolsa, halyqtyń qazirgi kredıt qaryzyn on nemese jıyrma ese jaýyp tastaýǵa bolar edi. Birinshiden, aktıvterdi elge qaıtaramyz dep zań qabyldadyq qoı. Sol zańnyń oryndalyp jatqany qaıda? Ýákiletti organ qurý jóninde ótkende habar boldy. Biraq ol habar mardymsyz. Sol aktıvterdi qaıtarý komıtetine 130 adamnan quralǵan shtat bolady dep edi. Qazir 30-40 adam dep qana tur. Naqty komıtette qansha adam bar ekenin aıtsańyzdar? Úkimetke suraq: komıssııanyń quramynda azamattyq qoǵam ókilderinen kimder bar?» - dep surady depýtat.

Óz kezeginde Bas prokýrordyń orynbasary Jandos Ómirálıev 5 qazanda Memleket basshysynyń jarlyǵymen komıtet qurylǵanyn eske saldy. 

«Onyń shtaty da quryldy. Barlyq normatıvti akt bar. 900 mlrd teńgeden astam qarajatty memlekettiń paıdasyna qaıtardyq. 600 mln dollar memleketten syrttan aýdaryldy. Aýqymdy jumys áli de jalǵasyp jatyr. Onyń ishinde kóptegen jer telimi qaıtaryldy. Árıne, komıssııanyń naqty reestri jáne onyń quramy bar. Oǵan Parlament depýtattary jáne qoǵamdaǵy belsendi azamattar kirdi. Olardyń aty-jónin sizge jeke beremin. Komıtettiń reestrine birlese otyryp sheshim qabyldandy. Onyń ishinde bizdiń quqyqtyq, ınvestorlyq jáne taǵy basqa áleýmettik máselelerdi eskerip, naqty reestrge qaı adamdardyń kirgenine qatysty másele áli jabyq. Biraq bul jumys jalǵasyp jatyr. Eger zańsyzdyq anyqtalsa, osy reestrge naqty kirgen tulǵalarǵa qatysty sheshim jarııa etiledi. Máselen, ınvestor birinshi kezekte óziniń quqyǵyn qorǵaý kerek qoı. Biz de onyń quqyǵyn qorǵaýymyz kerek. Sondyqtan kemshilikter men zańsyzdyqtar anyqtalǵan jaǵdaıda ǵana ol resmı túrde jarııalanady», - dedi J. Ómirálıev.

Buǵan deıin habarlanǵandaı, aktıvterdi qaıtarý tártibi jaıynda Ádilet vıtse-mınıstri Alma Muqanova túsindirgen edi.

Qazaqstanda zańsyz alynǵan aktıvterdi qaıtarý jónindegi komıssııa quryldy. Jaqynda QR Premer-Mınıstri Álıhan Smaıylovtyń tóraǵalyǵymen atalǵan komıssııanyń birinshi otyrysy da ótti.