Ermuhan Bekmahanov týraly fılmdi túsirýge ómir boıy daıyndaldym - rejısser S.Narymbetov

ASTANA. QazAqparat - Búgin Astanada kórnekti ǵalym, qazaqtan shyqqan tuńǵysh tarıh ǵylymynyń doktory, «HІH ǵasyrdyń 20-40 jyldardaǵy Qazaqstan» atty eńbektiń avtory, qazaq tarıhynyń janashyry, birtýar tulǵa Ermuhan Bekmahanovtyń ónegeli ómirin baıandaıtyn «Amanat» atty tolyqmetrajdy fılmniń aldyn ala kórsetilimi boldy. Kórsetilim 31 mamyr - saıası qýǵyn-súrgin qurbandaryn eske alý kúnine oraılastyryldy.

Fılmniń jelisi birneshe ýaqyt aralyǵyn qamtıdy: HІH ǵasyrdyń orta tusy - Kenesary hannyń táýelsizdik jolyndaǵy kúresi, HH ǵasyrdyń ortasy jáne 60-jyldardyń sońy. Fılmde qazaqtyń sońǵy hany Kenesary Qasymuly bastaǵan ult-azattyq kóteriliske arnalǵan zertteýleri úshin 25 jylǵa bas bostandyǵynan aıyrylǵan totalıtarlyq júıeniń qurbany, Alash arysy Ermuhan Bekmahanovtyń taǵdyry baıandalady. Qazaq halqynyń bolashaǵyna alańdaǵan fılmdegi ár keıipkerdiń taǵdyry óz zamanynda sýrettelse, olardyń alǵa qoıǵan maqsat-múddeleri bir - ar-ojdanyna berik bolý jáne óz halqynyń bostandyǵyna qol jetkizý.

Fılmniń rejısseri jáne stsenarıı avtory - Qazaqstannyń eńbek sińirgen qaıratkeri, QR Memlekettik syılyǵynyń laýreaty Satybaldy Narymbetov. Basty rólderde Berik Aıtjanov (Ermuhan Bekmahanov), Qarlyǵash Muhamedjanova (áıeli - Halıma), Sanjar Mádıev (Kenesary han), Ázız Beıshenalıev (KGB qyzmetkeri).

Kórsetilimnen keıin ótken baspasóz máslıhatynda rejısser Satybaldy Narymbetovtiń aıtýynsha, ol bul týyndyny jaryqqa shyǵarýǵa ómir boıy daıyndalyp, sońǵy 5 jylda tek osy jumyspen aınalysqan.

«Bekmahanovtyń otbasymen men 1960 jyldardyń sońynan beri jaqsy tanyspyn. Osy fılmge izdenip júrgen kezimde ǵalymnyń jubaıy Halıma apaı stenogrammalar jınaǵyn tabys etti. Onda Bekmahanov aıyptalar kezdegi áriptes-ǵalymdardyń oǵan qarsy aıtqan sózderi tolyq túsirilgen eken. Solardy oqyp, qatty nalydym, - deıdi rejısser. - Osydan keıin meniń tarıhha degen kózqarasym túbirimen ózgerdi. Buryn men tarıhty Joǵary oqý oryndarynda oqytylatyn pán retinde ǵana baǵalaıtynmyn. Biraq «Mustafa Shoqaı» fılminen keıin men oıǵa qaldym, osy saıası qýǵyn-súrgin kesirinen bizdiń qanshama arystarymyzdyń taǵdyry kúl-talqan boldy. Sodan bastap repressııaǵa ushyraǵan zııaly qaýym týraly, Alashordashylar týraly oılana bastadym. Mine, men osy taqyrypqa osylaısha keldim».

Aıta keteıik, fılm QR Mádenıet jáne sport mınıstrliginiń tapsyrysy boıynsha túsirildi.