Ermuhamet Ertisbaev QHP tóraǵasy bolyp saılandy

NUR-SULTAN. QazAqparat – Qazaqstan Halyq partııasynyń XIX kezekten tys sezi barysynda partııanyń saıası basshylyǵyn qaıta saılaý máselesi qaraldy. Uıymnyń tóraǵasy laýazymyna Ermuhamet Ertisbaev saılandy, dep habarlaıdy QazAqparat tilshisi.

Partııanyń parlamenttik fraktsııasynyń burynǵy basshysy ári partııa jetekshisi Májilis depýtaty Aıqyn Qońyrov tóraǵanyń birinshi orynbasary bolyp bekitildi.

Sezde qazirgi kezeńdegi Qazaqstan Halyq partııasynyń jańa maqsattary men mindetteri de talqylandy. Halyqshyldar atqarylyp jatqan jumystary týraly baıandap, múgedekter quqyqtaryn qorǵaý jónindegi jobalyq keńseniń qurylýy men elimizdiń kásipodaqtarymen eńbek quqyqtaryn qorǵaý baǵytyndaǵy yntymaqtastyq týraly áńgimeledi.

Aıqyn Qońyrov óz sózinde elimizdiń kúrdeli ótpeli kezeńdi bastan ótkerip jatqanyn atap ótti. Memleket basshysy Qasym-Jomart Toqaevtyń reformalary qoǵamdy demokratııalandyrýǵa jáne bılik tarmaqtarynyń teńgerimine alyp keletin jetkizdi. Bul protseste saıası partııalar mańyzdy ról atqarýy tıis.

«Bizdiń partııamyzdyń ádil demokratııalyq memleket týraly ıdeıasy jan-jaqty damýdy talap etedi. Partııanyń transformatsııasy budan bylaı da jalǵasa beredi jáne bul protsess úzdiksiz bolýy kerek. Bizdiń aldymyzda partııalyq qurylymdarda, memlekettik qyzmette, ókildi organdarda, azamattyq sektorda jumys tájirıbesi bar jańa kadrlarmen partııalyq basshylyqty eselep kúsheıtý máselesi tur», - dedi A.Qońyrov

Sezd barysynda QHP tóraǵasy qyzmetine E.Ertisbaevtyń kandıdatýrasy usynyldy.

«Ol belsendi partııa kóshbasshysy bola alady, isine myǵym depýtat, memleketshil mınıstr, dıplomat retinde tanylǵan. Bizdiń partııamyzǵa alǵash ret osyndaı aýqymdaǵy memlekettik, saıası jáne qoǵam qaıratkeri keldi, onyń tájirıbesi mol, bilimi men tájirıbesi jeterlik», - dep atap ótken jıyn qatysýshylary E.Ertisbaevtyń kandıdatýrasyn biraýyzdan maquldandy.

Óz kezeginde jańa tóraǵa partııa múshelerine senim bildirgenderi úshin alǵysyn bildirip, bul senimdi jan-jaqty aqtaý úshin óz kúshin, bilimi men saıası tájirıbesin barynsha jumsaýǵa ýáde berdi. Sonymen qatar QHP-ǵa degen el senimi aıtarlyqtaı ósip kele jatqanyn aıtty.

«Halyq partııasy» degen ataýdyń ózi ýaqyt óte kele máslıhattarda da, Májiliste de, Senatta da basym bolýy tıis degendi bildiredi», - dedi E.Ertisbaev.