Ermuhamet Ertisbaev: «Beıbit jınalystar týraly» zań - eń baıypty jetistik
«Andreı Chebotarev – ol tanymal qazaqstandyq saıasattanýshy. Ony qatty qurmetteımin ári kópten beri bilemin. Strategııalyq zertteýler ınstıtýtynyń dırektory bolǵanymda tabandy túrde jumysqa shaqyrǵan edim. Biraq, ol kelispedi jáne táýeldi saıasattanýshy bolǵysy kelmeıtindigin ashyq aıtqan bolatyn. Kóp kitap shyǵardy, monografııalar jazdy. Ol «Beıbit jınalystar týraly» jańa zań – bul eń baıypty jetistik» dep aıtqany bar. Onyń bul baǵalaýymen tolyqtaı kelisemin. Óıtkeni, Memleket basshysy 2019 jyldyń jazynda Prezıdenttik saılaýda jeńiske jetkennen keıin, Ulttyq qoǵamdyq senim keńesin quryp, óziniń baǵdarlamalyq maqsattaryn jarııa etken kezde beıbit jınalystar týraly jańa zań qabyldaý qajettigin aıtqan bolatyn. Búginde bul zańnyń jumys istep turǵanyn kórip otyrmyn», - dedi Ermuhambet Ertisbaev.
Onyń atap ótýinshe, zańdy tolyqqandy qoldanýǵa pandemııa kedergi keltirdi.
«Demokratııalyq partııa (Qazaqstanda tirkelmegen partııa) úsh ret mıtıng ótkizip úlgerdi. Pandemııa kezeńinde osynaý saıası belsendiliktiń qatty tómendep ketýi basqa másele. Eger ol bolmaǵanda «Beıbit jınalystar týraly» bul zań munan da kóbirek qoldanylar edi dep oılaımyn. Elimizde mundaı keń aýqymdy saılaýshylar toby narazylyǵynyń bolýyna, Prezıdenttik saılaýlardyń kúrdeliligine qaramastan Memleket basshysy óziniń saılaýda jeńiske jetkizgen saıası sózine adal bolǵandyǵyn atap ótkim keledi. Eger 2019 jyldyń naýryzynan bastap alar bolsaq, onda «Beıbit jınalystar týraly» zań – bul shynymen de eń baıypty jetistik», - dedi saıasattanýshy.
Ol atalǵan zańnyń Konstıtýtsııamen de sáıkestendirilgendigine nazar aýdartady.
«Al ol negizgi zańymyz jáne onda Qazaqstan azamattarynyń beıbit jınalystar men mıtıngiler ótkizýge quqyǵy bar ekendigi taıǵa tańba basqandaı jazylǵan. Bul erterekte oppozıtsııa «bılik ruqsat bermeıdi, ol jumys istemeıdi» dep synap kelgen Konstıtýtsııadaǵy norma. Onyń da negizgi bar. Óıtkeni, 8 jyl boıy Qazaqstanda eshqandaı mıtıng bolǵan emes. Bılik ÚEU negizinde birde-bir ret ruqsat bermedi. Al endi «Beıbit jınalystar týraly» zań jumys istep tur», - dedi Ermuhanbet Ertisbaev.