Ermekbaev dinı ekstremızm men terrorızmniń aldyn alý jumystaryn 2 baǵytta júrgizbek

ASTANA. QazAqparat - Din salasyndaǵy jumystardy úılestirý úshin Úkimet janynan vedomstvoaralyq komıssııa qurylady. Bul týraly Ortalyq kommýnıkatsııalar qyzmetindegi brıfıngte elimizdiń Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

«Din salasyndaǵy kóptegen vedomstvolardyń jumysyn úılestirý úshin Úkimet janynan vedomstvoaralyq komıssııa qurylatyn bolady. Osy oraıda mınıstrlik dindi teris maqsattarǵa paıdalanýǵa umytylatyn kez kelgen áreketke jol bermeý jáne jolyn kesý úshin barlyq sharalardy qabyldaıtyndyǵyn atap aıtqym keledi»,-  dedi ol.

Onyń aıtýynsha, dinı ekstremızm men terrorızmniń aldyn alý jumystary negizgi 2 baǵytta, atap aıtqanda jalpy profılaktıka jáne maqsatty reabılıtatsııalaý jumystary arqyly júrgiziletin bolady.

«Jalpy profılaktıka qoǵamda dinı ekstremıstik ıdeologııany jaqtyrmaý ahýalyn qalyptastyrýdy, dinge qyzyǵýshylyq tanytatyn turǵyndardyń saýatyn kóterýdi kózdeıtin bolady.  Al maqsatty reabılıtatsııa, ıaǵnı ońaltý táýekel toptar men ekstremıstik aǵymdardyń ıdeologııalaryna erip ketken adamdardy teologııalyq turǵydan dástúrli senimge qaıtarý maqsatynda jeke jumystar júrgizý arqyly iske asyrylady. Bul baǵyttaǵy sharalar barysynda Іshki ister mınıstrliginiń túzeý mekemelerinde, ıaǵnı kolonııalarda jazalaryn óteýshilerge  erekshe nazar aýdarylady», - dedi Ermekbaev.