Ermekbaev Azamattyq bastamalardy qoldaý ortalyǵynda boldy

ASTANA. QazAqparat - Búgin QR Din isteri jáne azamattyq qoǵam mınıstri Nurlan Ermekbaev «Azamattyq bastamalardy qoldaý ortalyǵy» kommertsııalyq emes aktsıonerlik qoǵamynda boldy. Bul jaıynda QazAqparat atalǵan mınıstrliktiń baspasóz qyzmetine silteme jasap habarlaıdy.

Mınıstr ortalyqtyń qyzmetimen tanysyp, ujymmen kezdesti. Kezdesý aıasynda ol ortalyqty odan ári damytý jolyndaǵy birqatar basym baǵyttardy atap ótti.

«Ortalyq jobalardy júzege asyrý jáne qarjylandyrý protsesiniń ashyqtyǵyn qamtamasyz etýdi jalǵastyrýy qajet. Grantqa ilikpegen uıymdarǵa aqparat berýi tıis. Ol úshin arnaıy alańdardy uıymdastyryp, grantqa úmitker uıymdarǵa ózderiniń iske asyrǵan jobalarynyń nátıjelerin kórsetýge múmkindik berý qajet», - dedi Nurlan Ermekbaev.

Mınıstrdiń paıymynsha ortalyq memlekettik emes granttardy berý jáne grant taǵaıyndaıtyn sheteldik uıymdardyń qyzmetin tájirıbe retinde qarastyryp, zerdeleýi qajet.

 

«Demeýshilerdi jáne bıznes qoǵamdastyqty granttyq qarjylandyrýdy júzege asyrýǵa tartý boıynsha jumystardy jandandyrý qajet», - dedi mınıstr.

Mınıstr alǵa qoıylǵan mindetterdi nátıjeli oryndaý úshin  30-31 qazan kúnderi Atyraý qalasynda ótetin «Asar» respýblıkalyq úshjaqty seriktestik forýmyna qatysyp, sonyń aıasynda uıymdastyrylatyn yntymaqtastyq alańdaryn barynsha tıimdi paıdalanýdy usyndy. 

Óz kezeginde «Azamattyq bastamalardy qoldaý ortalyǵy» KEAQ basqarma tóraǵasy Nurlan Óteshev ortalyq qyzmetiniń negizgi baǵyttary jáne atqarylyp jatqan jumystar men aldaǵy josparlar jaıynda habardar etti.

Eske sala keteıik, Azamattyq bastamalardy qoldaý ortalyǵy 2016 jyldyń aqpan aıynda qurylǵan bolatyn. Onyń negizgi mindeti - úkimettik emes uıymdarǵa memlekettik granttar bólý jáne olardyń oryndalý sapasyn baqylaý.