Ermek Marjyqpaev Býrabaı aýdanyndaǵy jylý qazandyqtarynyń qysqa daıyndyǵyn tekserdi

KÓKShETAÝ. QazAqparat - Aqmola oblysynyń ákimi Ermek Marjyqpaev Býrabaı aýdanynda bolyp, áleýmettik nysandardy, avtomobıl joldaryn jóndeýmen jáne jylytý maýsymyna oraı daıyndyq barysymen tanysty, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Aýdan ortalyǵyndaǵy joldardyń jalpy uzyndyǵy - 134 km. jalpy aýdanda jol ınfraqurylymynyń 18 jobasy júzege asyrylýda.

«Zelenyı bor aýylynyń «Saryarqa» shaǵynaýdanynyń joldaryn ortasha jóndeýge shamamen 100 mln teńge bólindi, búgingi kúni jumystar aıaqtaldy, kirme joldarǵy asfalt tóseldi», – dep túsindirdi aýdan ákiminiń orynbasary Erlan Bıdanov.

Sonymen qatar, oblys basshysy eki áleýmettik nysannyń – «Oblystyq olımpıadalyq rezervti daıyndaý ortalyǵy» KMM sport kesheniniń jáne Zelenyı bor aýylynyń mádenıet úıindegi kúrdeli jóndeý jumystaryn baryp kórdi.

Sport kesheni 1986 jyly paıdalanýǵa berildi. Ǵımarat eki qabatty, jalpy aýdany 3946,0 sharshy metr. Basseın, oıyn, trenajer jáne sport zaldary jumys isteıdi.

Dırektor Beıbit Aýashahmetovtyń aıtýynsha, jóndeý jumystary 2022 jyly merdiger – «KazEvroStroı» jaýapkershiligi shekteýli seriktestigi qolǵa alǵan. Qazirgi kezde ol aıaqtalýǵa jaqyn. Jeldetý ornatyldy, sý qubyry, káriz, elektr jaryǵy aýystyryldy. Keramıkalyq plıtkalardy tóseý, qabyrǵalardy sylaý jáne boıaý jumystary júrgizildi.

«Oblystaǵy mundaı zaldar – sanaýly. Zelenyı bor fýtbol, voleıbol, basketbol sııaqty komandalyq sport túrlerin daıyndaýmen tanymal. Sporttyq dástúrlerdi jańǵyrtý qajet», - dep atap ótti Ermek Marjyqpaev.

Bıylǵy jyly aýdandyq mádenıet úıine jóndeý jumystary bastaldy. Onyń merdiger uıym – «GradStroıservıs» jaýapkershiligi shekteýli seriktestigi qolǵa alyp otyr.

«Ár aýyldaǵy mádenıet úıi - basty tartymdylyq ortalyqtarynyń biri. Ǵımarattyń bos turýyna jol bermeý kerek, jóndeý jumystary belgilengen merzimde aıaqtalýy kerek», – dep atap ótti oblys ákimi.

Sonymen birge aımaq basshysy Şýche qalasyndaǵy №1 mektep – gımnazııasynda boldy. Kúrdeli jóndeý barysy týraly mektep dırektory Lıýbov Tkacheva baıandady.

Onyń málimetinshe, qazirgi ýaqytta qasbetti jóndeý, terezelerdi aýystyrý, irgetasty nyǵaıtý, soqyr aımaq pen kirý tobyn jóndeý jumystary júrgizilýde.

Memleket basshysynyń qaýipsizdikti qamtamasyz etý jónindegi tapsyrmasy aıasynda mektepte týrnıketter men beınebaqylaý júıesi ornatyldy.

Eń mańyzdy máselelerdiń biri - jylytý maýsymyna daıyndyq. Osy rette, oblys basshysy Şýche qalasy men Zelenyı bor aýylynyń qazandyqtaryna baryp, Remzavod shaǵyn aýdanyndaǵy jylý jelileriniń jóndeý jumystaryna nazar aýdardy.

Aımaq basshysy aýdan basshylyǵyna jylytý maýsymyna daıyndyq máselelerin erekshe baqylaýda ustaýdy tapsyrdy.

Aıta ketsek, budan buryn Ermek Marjyqpaev Qosshy qalasy men Tselınograd aýdanyndaǵy mektepterdiń oqý jylyna daıyndyǵyn teksergenin jazǵan edik.