Ermek Marjyqpaev Aqkól aýdanynyń turǵyndarymen kezdesti
Novorybınka aýylynda ótken kezdesýge jergilikti atqarýshy jáne aýmaqtyq memlekettik organdardyń basshylary qatysty.
Aımaq basshysy turǵyndardy oblystyń áleýmettik-ekonomıkalyq damýy týraly habardar etti.
2023 jyldyń birinshi toqsanynyń qorytyndysy boıynsha oblys ekonomıkasynyń negizgi salalary oń serpindi saqtap otyr, kóptegen kórsetkish boıynsha ósim qamtamasyz etildi.
Aıta ketsek, Aqmola oblysy sońǵy 3 jyldaǵy áleýmettik-ekonomıkalyq damý kórsetkishteri boıynsha respýblıkada kóshbasynda tur.
Aqkól aýdanynyń áleýmettik-ekonomıkalyq damý kórsetkishterine keletin bolsaq, negizgi kapıtalǵa ınvestıtsııalar, turǵyn úılerdi paıdalanýǵa berý jáne qurylys jumystarynyń kólemi boıynsha úsh ındıkator oryndalmady.
Osy rette oblys ákimi aýdan basshylyǵyna osy nysanaly ındıkatorlardyń oryndalýyna qol jetkizýdi tapsyrdy.
Kezdesý barysynda turǵyndar Novorybınka aýylyndaǵy joldy jóndeý sapasyna, «Senim» JShS medıtsına qyzmetkerlerine arnalǵan emdeý-saýyqtyrý ortalyǵynyń qurylysy» obektisine jol tósemin jóndeý qajettiligine qatysty saýaldar qoıdy.
Jolaýshylar kóligi jáne avtomobıl joldary basqarma basshysy Vladımır Kýlakovtyń aıtýynsha, bul máseleler baqylaýǵa alyndy jáne múmkindiginshe jaqyn arada sheshiletin bolady.
Jalpy, jol jóndeý sapasy máselesi turaqty baqylaýda.
Oblys ákimi atap ótkendeı, bıyl Keńes, Novorybınka aýyldarynda, Ýrıýpınka-Erofeevka jol ýchaskesinde avtomobıl joldaryn aǵymdaǵy jóndeý, Aqkól qalasynda, Eńbek aýylynda joldardy ortasha jóndeý, Aqkól-Azat-Qaınar jáne Jańa Kolýton – Azat – Mınskoe baǵytyndaǵy jol ýchaskesin jóndeý josparlanǵan.
Keńes aýyldyq okrýginiń Dombyraly aýylyna kirme joldy ortasha jóndeý» nysany boıynsha jobalyq-smetalyq qujattamalary ázirleýge, Aqkól qalasyndaǵy Imanov kóshesindegi joldy kúrdeli jóndeýge qarajat bólindi.
Sondaı-aq, aýyl turǵyndary dárihana pýnktin ashýǵa jáne jedel járdem mashınasyn satyp alýǵa kómek surady.
«Aqkól aýdanynyń áleýeti joǵary. Medıtsınalyq pýnkt jáne jedel járdem máselesin sheshemiz. Dárihana boıynsha másele aýdan ákimdiginiń kúshimen sheshiletin bolady», - dedi Ermek Marjyqpaev.
Kezdesýde aıtylǵandaı, densaýlyq saqtaý salasynda oblystyq bıýdjetten ortalyq aýdandyq aýrýhana ǵımaratyn kúrdeli jóndeýge jobalyq-smetalyq qujattamany ázirleýge 31 mln teńge qarastyrylǵan.
«Aýyldyq densaýlyq saqtaýdy jańǵyrtý» ulttyq jobasy aıasynda Qyna, Ýrıýpınka jáne Novorybınka aýyldarynda ambýlatorııalyq-emhanalyq uıymdar salý josparlanǵan.
Bul nysandardyń qurylysyna arnalǵan jer ýchaskeleri qazirdiń ózinde anyqtalǵan.
«Men únemi aýyldardy aralap, turǵyndardy tolǵandyrǵan máselelerin surap bilemin. Kóp jumys atqarylyp jatyr. Biraq másele de jeterlik, onyń barlyǵyn bir ýaqytta sheshý múmkin emes, sondyqtan biz olardy kezeń-kezeńimen sheshemiz. Meniń oıymsha, aýyl turǵyndary bul máselelerge túsinistikpen qaraıdy», - dedi oblys ákimi.
Sondaı-aq, oblys basshysy jergilikti bıznesti shette qalmaýǵa, aýyldy damytý úshin áleýmettik jáne ınfraqurylymdyq jobalarǵa belsendi qatysýǵa shaqyrdy.
«Aýdanda halyqty tolǵandyratyn birqatar máseleler bar, olardyń ishinde sýmen jabdyqtaý, joldardy jóndeý, turǵyn úı-kommýnaldyq sharýashylyq jáne áleýmettik-eńbek salasy boıynsha jumys isteý kerek», - dep qorytyndylady Ermek Marjyqpaev.
Halyqpen kezdesýden keıin ákim jeke máselesimen kelgen turǵyndardy qabyldady.
Eske sala ketsek, budan buryn Kókshetaýda jańa stýdentter saraıy salynyp jatqanyn jazǵan bolatynbyz.