Ermaǵanbet Bólekpaev Balqash turǵyndarymen jańa formatta kezdesti

BALQASh. QazAqparat – Balqashtyqtar oblys ákimimen, basqarma, polıtsııa jáne ekologııa departamentiniń basshylarymen elektrondy kezek arqyly, zalda mıkrofondar men aýdıtorııasyz ótken kezdesýdiń jańa formatyn baǵalaı aldy, dep habarlaıdy QazAqparat tilshisi.

Metallýrgter mádenıet úıi zalynda Ermaǵanbet Bólekpaev áriptesterimen birge qala turǵyndarynyń suraqtaryna jaýap berdi.

Kezdesý eki jarym saǵatqa sozyldy.

Osy ýaqyt ishinde 69 adam júgindi. Árbir ekinshi turǵyn oblys ákimine suraq qoıdy.

Balqashtyqtardy erekshe tolǵandyratyn jáne birinshi kezekte turǵan másele – sýmen jabdyqtaý.

Ermaǵanbet Bólekpaevqa birinshi nómirli talondy Taıtóleý Jumanov bastaǵan ardagerler keńesiniń toby aldy.

Belsendiler sý tapshylyǵy máselesin sheshý boıynsha óz usynystaryn aıtty. Al Balqash kóliniń ekologııasyn jaqsartý úshin qamys toǵaılarynan qutylý maqsatynda shyǵanaqtaǵy bógetter júıesin ózgertý qajet dep sanaıdy.

«Biz taza aýyz sýdy shamadan tys kóp jumsaımyz. Biz onymen baqshalarymyzdy sýaramyz. Kombınat ta ony sanıtarlyq-turmystyq qajettiligine paıdalanady. Sonymen qatar, bul sýdy avtokólik jýý oryndary da tutynady. Muny retteý qajet, aınalymdaǵy sý paıdalanylýy tıis. Bizdiń sózimizge memlekettik organdar qulaq asty, barlyq usynystarymyzdy jazyp aldy. Kezdesýge rızamyz», – deıdi Taıtoleý Jumanov.

Turǵyndar sonymen qatar abattandyrý, áleýmettik ınfraqurylym men joldardyń sapasy, týrızmdi damytý máselelerine qatysty oılaryn jetkizdi. Sonymen qatar, jer, tarıf belgileý, áleýmettik kómek jáne medıtsınalyq qyzmetter máseleleri kóterildi.

Jergilikti máselelermen de kelgender boldy. «Qazposhta» jumysyna shaǵymdandy: Balqashtaǵy abonentterge gazetter úlken kidirispen jetkiziletinin aıtty.

Qaladaǵy bilim salasy bastaýynda turǵan tanymal ustaz Zınıtýlla Dalıbaevtyń esimin máńgilikke asqaqtatýdy surady.

Kezdesýge Almatydan kelgen qoǵam qaıratkeri Áıgerim Tileýbaı ekologııalyq qaýipsizdik jobalary týraly aıtyp berdi. Ol pikirlesterimen birge Balqash kóline qamqorlyq jasaýǵa baǵyttalǵan mektep uıymdastyrǵan.

Balqash qalasynyń belsendisi Anar Adambekovanyń pikirinshe, kezdesýlerdiń jańa formaty qyzyq.

Bul «Halyq únine qulaq asatyn memleket» kontseptsııasyna dál keletin kezdesý bolǵanyn da atap ótti.

«Onyń tıimdi bolýy mańyzdy. Munda barlyq bólimshelerdiń basshylary ornalasqan. Eger adam jaýapqa qanaǵattanbasa, olar aımaq basshysyna tikeleı júgine alady. Bul durys dep sanaımyn, ár másele óz deńgeıinde sheshilýi tıis», – dep atap ótti Balqash qalasy ákiminiń keńesshisi.