Erlikpen qaza tapqan órt sóndirýshi Asqar Zabıkýlın týraly serıal túsirilip jatyr
«Qazir Asqarǵa jáne óz ómirin qaterge tigip, kúnde otpen kúresetin órt sóndirýshiler men qutqarýshylarǵa arnalǵan «Qaharman» serıalynyń túsirilimi júrip jatyr. Túsirý toby búgin Astanaǵa kelip, birden jumysqa kiristi.
Árıne, búkil protsesti óz kózimizben kórý múmkindigin jiberip almadyq. Aıta keteıin, kıno túsirý ońaı emes. Biz ol jerde 5 saǵattaı boldyq. Túsirilimge daıyndyq, birneshe dýbl, rakýrs, jaryq. Bul – bir ǵana kórinisti túsirý kezinde kórgen qıyndyqtyń kishkene ǵana bóligi. Barlyq túsirilim tobyna qajyrly eńbegi úshin raqmet. Serıal barlyǵyna unaıdy dep senemin», – dep jazdy Anel Zabıkýlına Instagram jelisinde.
Aıta keteıik, 2022 jyldyń 16 qarashasynda Astanada 15 qabatty úıden órt shyqty. Saldarynan 3 adam, onyń ishinde bir bala aýrýhanaǵa tústi. Birneshe adamdy qutqarǵan órt sóndirýshi Asqar Zabıkýlınniń denesin 80% kúıik shalyp, jansaqtaý bólimine jatqyzyldy. 20 qarashada ol astanalyq aýrýhanada qaıtys boldy. Dárigerler onyń ómiri úshin birneshe kún kúresken bolatyn.
Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.
Asqar Zabıkýlın I dárejeli «Aıbyn» ordenimen marapattaldy. 20 jeltoqsanda oǵan «Altyn adam» syılyǵy tabys etildi.
28 jeltoqsanda Astana qalalyq máslıhaty sheshimimen erlikpen qaza tapqan órt sóndirýshi Asqar Zabıkýlınniń esimi jańa kóshege berildi.