Erlikpen qaza tapqan qyzmetkerdiń balasyna daryndy oqýshylarǵa arnalǵan mektepten grant beriledi

ASTANA. QazAqparat – Qyzmettik boryshyn óteý kezinde erlikpen qaıtys bolǵan polıtsııa, órt sóndirý salasy men áskerı qyzmetkerlerdiń balalary kolledjder men daryndy balalarǵa arnalǵan mektepterde grantpen oqı alady. QR Oqý-aǵartý mınıstri Ashat Aımaǵambetov vedomstvonyń apparat jınalysynda osyndaı ózgeris ázirlenip jatqanyn aıtty, dep habarlaıdy QazAqparat tilshisi.

«Ózderińiz jaqsy bilesizder, Prezıdent Qasym-Jomart Toqaevtyń tapsyrmasy boıynsha, óz boryshyn óteý kezinde qaıtys bolǵan polıtsııa, órt sóndirý, ásker qyzmetkerleriniń otbasyna bilim berý salasy boıynsha tıisti jeńildikter berý máselesi sheshimin taýyp jatyr. Atap aıtsaq, balabaqshalarǵa olardyń balalaryn kezeksiz alý máselesi, joǵary oqý oryndaryna grant berý máselesi sheshimin tapqanyn bilesizder. Endigi kezekte osy balalardyń bizdiń kolledjderge grant alýy jáne mamandandyrylǵan daryndy balalarǵa arnalǵan mektepterge grant alyp, túsý máselesin sheship jatyrmyz. Jaqyn arada bul máseleni tolyǵymen sheship bitiremiz dep aıtqym keledi», - dedi vedomtsvo basshysy.

Ashat Aımaǵambetovtiń paıymynsha, mundaı erlik kórsetken azamattardyń úlgisin tárbıe berý jumysynda mindetti túrde qarap, balalardyń bárine jetkizý kerek.

«Óıtkeni bul shyn máninde úlken erlik. Erlik kórsetken azamattardyń esimi el esinde bolýy kerek jáne osyndaı mysaldarmen, osyndaı úlgilermen biz tárbıe jumysyn júrgizýimiz kerek. Sondyqtan osy jeńildikterdi engizý boıynsha Prezıdent tapsyrmasyn iske asyryp jatyrmyz. Jaqynda tıisti ózgerister júzege asady dep oılaımyn», - dedi mınıstr.