Erlan Turǵymbaev TMD elderinde jazasyn ótep jatqan azamattar týraly aıtty

NUR-SULTAN. QazAqparat – Parlament Májilisiniń jalpy otyrysynda «Táýelsiz Memleketter Dostastyǵyna qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konventsııany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Qujatqa TMD memleketteriniń basshylary 2019 jylǵy 11 qazanda Ashǵabad qalasynda qol qoıdy.

Konventsııanyń negizgi maqsaty – ár azamatqa óz jazasyn turǵylyqty jeri boıynsha óteýge múmkindik berý.

«Konventsııaǵa sáıkes sottalýshy nemese onyń zańdy ókili óz jazasyn turǵylyqty jerinde óteý týraly ótinish beredi. Ótinish boıynsha sol eldiń bas prokýratýrasy suraý salady», - dedi QR Іshki ister mınıstri Erlan Turǵymbaev.

Suraý salýǵa myna qujattar qosa beriledi: sottalýshynyń azamattyǵy, sot sheshiminiń kóshirmesi, minezdeme, keltirilgen shyǵyn týraly málimetter.

«Jazasyn óteýshini qabyldaıtyn memleket belgilengen jazadan qatań emes jaza taǵaıyndaıdy. Jazasyn óteýshi sheshim qabyldaǵan soń, 45 kúnde óz betinshe elden shyǵýy tıis. Al eger bul talap oryndalmasa, zań boıynsha májbúrli túrde elden shyǵarylady. Suraý salýdan bas tartý negizderi de qarastyrylǵan. Ulttyq zańnamaǵa sáıkes jazasyn óteýshiniń áreketi qylmys bolyp sanalmasa, qylmystyń merzimi ótip ketse, el táýelsizdigi men ulttyq qaýipsizdigine qaýip bolsa, ulttyq zańnamaǵa qaıshy ózge de jaǵdaıda bas tartylady», - dedi mınıstr.

Onyń aıtýynsha, qazirgi ýaqytta elimizde 447 shetel azamaty probatsııada tur. Olardyń arasynda Ózbekstannan 216, Reseıden – 138, Qyrǵyzstannan – 38, Armenııadan 5 azamat bar. Al ózge elderde 280 Qazaqstan azamaty jazaǵa tartylǵan. Sonyń ishinde Reseıde 251, Ózbekstanda – 24, Qyrǵyzstanda – 2, Belarýsta úsh azamat bar.