Erlan Sydyqov Ulttyq aza tutýdyń jarııalanýy týraly: Bul - salamattyq sabaǵy
«Álemdik koronavırýs pandemııasynyń eldegi kúrdeli jaǵdaıy men oǵan qarsy shuǵyl is-sharalarǵa baılanysty Prezıdent Qasym-Jomart Toqaevtyń televızııalyq úndeýi asa mańyzdy jáne kókeıkesti dep bilemiz. Óıtkeni osynaý jaýapty kezeńde jurtshylyq shynaıy da bilikti salamattylyq jumystarymen birge aǵymdaǵy túrli kúrdeli máselelerge naqty jaýapty qajetsinip otyrǵany da ras. Birden aıtaıyq, Memleket basshysy men Úkimet jahandyq qaýip – vırýs indetiniń aldyn alýǵa qatysty keshendi jumystardy saýatty, júıeli bastady. Degenmen ǵalamdaný zamanynda koronavırýstiń alapat qıyndyq týǵyzatynyn sát saıyn sezdik. Onymen kúrestiń aqyl men bilikke, birlik pen kúsh-jigerge arqa súıeıtinin jáne onyń úılestirýshisi – memleket bolǵanymen, barlyq másele halyqtyń saqtyq sharalaryna kelip tireletinin ańǵardyq», - dedi ýnıversıtet basshysy.
Onyń atap ótýinshe, sońǵy derekter men málimetter jer-jerde osy másele bosańsyp ketkenin ańǵartty. Sala dárigerleriniń janqııarlyq eńbegine beıqamdyqpen, nemquraılyqpen kóleńke túsirýshiler de kóbeıe bastady. Sonymen birge halyq qınalǵan kezde dári-dármektiń spekýlıatsııasy dúrbeleń týǵyzdy. Saraptan ótpegen aqparat, qıly dereksiz málimet áleýmettik jelini ushyndyryp jiberdi.
«Qazaqstan Respýblıkasynyń Prezıdenti Qasym-Jomart Toqaev halyqqa arnalǵan 8 shildedegi úndeýinde: «Koronavırýstyń taralýyna baılanysty densaýlyq saqtaý júıesine kóp aýyrtpalyq túsýde. Ashyǵyn aıtý kerek, densaýlyq saqtaý júıesi indetke toıtarys berýge daıyn bolǵan joq. Osy másele boıynsha biz tergeý júrgizemiz jáne bul jaǵdaıdan sabaq alamyz. Ákimderdiń jibergen qatelikterine tıisti baǵa beremiz. Degenmen, memleket tarapynan barlyq qajetti sharalar qabyldanýda. Qabyldanǵan sharalar men medıtsına qyzmetkerleriniń erliginiń arqasynda emdelip shyǵyp jatqan azamattardyń sany edáýir kóbeıdi. Kóptegen elderdegi jaǵdaı bizden de qıyn. Degenmen, «Ár qazaq – meniń jalǵyzym» degendeı, Ár azamatymyzdyń qazasy meniń júregime qatty batady» dep máseleni búkpesiz aıtty. Rasynda, koronavırýske shaldyqqan alǵashqy naýqas anyqtalǵan 13 naýryzdan bastap árbir kún, árbir saǵat, árbir mınýt 18 mıllıon 400 myńǵa jýyqtaǵan Qazaqstan halqy úshin zor synaq boldy. Memleket basshysy sol kezde-aq aıtqandaı: «Biz dúrbeleń týdyrýǵa jol bermeımiz. Dál osy kezde halyq memleketke qoldaý kórsetýi kerek. Bul asa mańyzdy. Koronavırýs – batpandap kirip, mysqaldap shyǵatyn qaýipti dert»«, - dedi Erlan Sydyqov.
Ýnıversıtet rektory Prezıdent aıqyndaǵan salamattylyq sabaǵyn alý, túptep kelgende, tek atqarýshy bılikke ǵana emes, bárimizge qatysty. Bul rette Memleket basshysynyń myna sózi sát saıyn jadymyzda turýy tıis: «Bul indetti adamzat jýyq arada jeńe qoımas. Alaıda, ýaıym men qaıǵyǵa batyp, túrli qaýesetterge senip, eńsemizdi túsirýge taǵy da bolmaıdy. Salmaqty, sabyrly bolaıyq! Bizdiń jumysymyz – aıqyn, qoǵam aldynda eshnárseni jasyrmaı, ashyq aıtamyz. Bolashaqta da solaı bolady. Búkil kúsh jigerimizdi jınap, indetpen kúrese berýimiz kerek».
«Sonymen birge koronavırýs indetinen kóz jumǵan otandastarymyzdy eske alý úshin 13 shildeni Ulttyq aza tutý kúni dep jarııalaýy da salamattylyq sabaǵyn nyqtaı túskendeı. Bul – adamı jaýapkershilik jáne ımandylyq sharty. Qasym-Jomart Kemeluly jahandyq qaýipke qarsylyq sharalary men kesepattyń ekinshi kezeńimen kúreske daıarlyqtyń mán-jaıyna da jan-jaqty toqtaldy. Birinshiden, alǵashqy medıtsınalyq kómek kórsetý jumysy odan saıyn jetildiriledi. Elde ýnıversaldy 400 mobıldik emdeý brıgadasy bolsa, shilde sońyna deıin onyń sany 3,5 myńǵa arttyrylmaq. Ekinshiden, aýrýhanalarda osy dertke baılanysty oryndar kóbeıtiledi. Ol qazir 70 paıyzǵa arttyrylyp, 43 myńdy qurasa, endi qarýly kúshterdiń kómegimen dala gospıtaldaryn jasaqtaý da qolǵa alynady. Úshinshiden, kúnine 40 myń qan testin sapartaı alatyn 8 mobıldi ortalyq turaqty jumys isteıtin bolady. Tórtinshiden, dári-dármek tapshylyǵy, qoljetimdiligi keshendi túrde sheshiledi. Alyp-satarlar aıaýsyz jazalanady. Qosymsha tynys berý apparattary qajet mólsherde satyp alynady. Besinshiden, koronavırýsty emdeıtin sheteldik jáne otandyq dárilerdiń sertıfıkatsııasy men qoldaný amaldary jyldamdatylady», - dedi ol.
Erlan Sydyqov Memleket basshysynyń: «Biz – talaı zobalań men synaqty bastan ótkergen, tarıhtyń talaı daýylyna boı bermegen halyqpyz. Batyr babalardyń jolyn jalǵaǵan búgingi urpaq ta qazirgi qıyndyqqa tótep beredi dep senemin. Bálkim, bul bizdiń birligimizdi baıqaý úshin berilgen synaq shyǵar. Bir jeńnen qol, bir jaǵadan bas shyǵaryp, uıymdasa bilsek, bul synnan da ótermiz» dep, barshamyzdy jigerlendirgeni de – eleýli fakt ekendigine basa nazar aýdartady.
«Ras, qaı synaqtan bolsyn, dana Abaı aıtqandaı, qaırat pen aqyl alyp shyǵady. Mundaı áleýet elimizde bar. Biz – joǵary bilim salasynyń mamandarymyz. Sondyqtan salamattylyq sabaǵyna ǵylym kózimen qaraý – mindetimiz. Bul turǵydan kelsek te, úndeýdiń júıeliligi men naqtylyǵy daǵdarys salmaǵyn da, soǵan baılanysty amal-tásilderdi aıqyn túsindirip tur. L.N.Gýmılev atyndaǵy Eýrazııa ulttyq ýnıversıteti – 24 myńǵa jýyq adamnan turatyn irgeli ujym. Memleket pen úkimet tapsyrmasymen qashyqtan oqytý úderisin tolyq tájirıbeden ótkizip, qabyldaý emtıhandaryn da salamattylyq tártibimen júrgizýge járdemdesip jatyrmyz. Muny júıelegen Bilim jáne ǵylym mınıstrligi barshamyzdy memlekettilik talap tóńiregine toptastyra bildi. Oqytýshy-ǵalymdarymyz ben bilim alýshylarymyzdyń talap-jigeri, arman-ıeti Otanymyzdyń tilegimen úndesedi. Olar qıyn da jaýapty kezeńde qajetti salamattylyq sharalaryna atsalysýǵa daıar», - dedi EUÝ rektory.