Erlan Sydyqov: Tarıhshylar ǵylymı dáleldengen faktilermen bilim berýi tıis
«Keshe ǵana Qazaqstan Prezıdenti Qasym-Jomart Kemeluly ózi zertteýge bastama usynys jasaǵan Joshy tulǵasy jáne onyń ulysynyń tarıhy - Uly dalanyń jasampaz tarıhymen óte tyǵyz astasyp jatyr. Qazaq handyǵy dáýirimen maqtanatyn da sonymen qatar, qaperimizge toqyp alyp, saqtyq jasaıtyn jaqtarymyz da bar. Qazaq handyǵynyń 550 jyldyǵy ótken tarıhtaǵy memlekettigimizdi zerdeleýge, odan sabaq alýǵa jeteledi. Biraq biz tek Qazaq handyǵy dáýirimen ǵana shektelip qalmaýymyz kerek. Ony osynda otyrǵan tarıhshylar qaýymy jaqsy túsinedi degen pikirdemin. Bizdiń odan arǵy tarıhymyz bar. Ol tarıh – asa baı, jasampaz tarıh. Ótken tarıhty bilmeı búgingini durys jolǵa sala almas edik. Búginimizdi qadyr tutpasaq, erteńniń de baıandy bolýy ekitalaı», - dedi Erlan Sydyqov elordada ótken «Joshy ulysy tarıhynyń máseleleri» VІІ tarıhshylarynyń ulttyq kongresinde.
EUÝ rektorynyń aıtýynsha, Memleket basshysynyń: «Ulttyq ıdeıanyń tujyrymy ulttyq tarıhı keńistikte jatyr» degen sózin de esten shyǵarmaý kerek. Osynaý ǵasyrlar qoınaýynan búginge deıin jol tartqan rýhanı qazynany – «tól tarıhty» qoǵamymyz memleket múddesimen birlikte qarastyrǵan abzal.
«Otandyq tarıhtaǵy negizgi oqıǵalardyń mazmuny týraly ǵylymı dáleldengen faktiler negizinde mindetti tolyq bilim berý tarıhshylardyń basty qyzmeti dep sanaımyn. Tarıhı-mádenı damýdyń úzdiksizdigi men sabaqtastyǵyn dáleldi kórsetý gýmanıtarlyq sala ókilderiniń ult aldyndaǵy basty mindeti dep bilemin. Rýhanı muragerliktiń tereń tamyrlaryn, burynǵy urpaqtyń qajyrly eńbegin, halyqtyń jeke tulǵalaryn, tarıhı tájirıbeni jáne ulttyq dástúrlerdi qurmetteıtin jastardyń ustanymyn qalyptastyrý – búgingi birtutas qoǵamymyzdyń ólsheýsiz paryzy bolmaq. Qoǵamǵa yqpal etýshi, ári memleketimizdiń zııatker áleýetin qalyptastyrýshy jáne jańa ıdeıalardy beretin de ult tarıhy ekendigi aqıqat shyndyq», - dedi ol.