Erlan Saıyrov: Úkimet endi Parlament aldynda otstavkaǵa ketedi

ASTANA. QazAqparat - Saıasattanýshy Erlan Saıyrov Memleket basshysy Nursultan Nazarbaevtyń bılik tarmaqtary arasynda ókilettikterdi qaıta bólý týraly arnaıy úndeýinen keıin QazAqparat tilshisimen áńgimelese otyryp, Elbasynyń bul sheshimi naǵyz saıası reforma ekenin atap ótti.

«Meniń oıymsha, bul alǵa qaraı basylǵan úlken qadam. Bul - naǵyz saıası reforma. Endi Parlamenttiń ókilettigi artady. Úkimet endi Parlamenttiń aldynda otstavkaǵa ketedi», - deıdi saıasattanýshy.

Erlan Saıyrovtyń aıtýynsha, Úkimet múshelerin, ıaǵnı mınıstrlerdi de endi Parlament taǵaıyndaıtyn bolady.

«Parlament mınıstrlerdi taǵaıyndaıdy. Prezıdent óziniń úndeýin búkilhalyqtyq talqylaýǵa salyp otyr. Sondyqtan, azamattardyń kóbi bul máseleni jan-jaqty talqylap, bir túıinge kelýi kerek», - deıdi E.Saıyrov.

Aıta keteıik, keshe QR Prezıdenti Nursultan Nazarbaev otandyq telearnalar arqyly bılik tarmaqtary arasynda ókilettikterdi bólý máseleleri jónindegi úndeýin jarııa etti. Onda Prezıdenttiń  áleýmettik-ekonomıkalyq protsesterdi retteýdegi birshama ókilettikterin Úkimetke jáne basqa da atqarýshy organdarǵa berý, Úkimetti jasaqtaýda Parlamenttiń rólin kúsheıtý qarastyrylǵan.