Erlan Saıyrov: Eń bastysy – elde konstıtýtsııalyq tártipti qalpyna keltirý

NUR-SULTAN. QazAqparat – QR Parlamenti Májilisiniń depýtaty Erlan Saıyrov QR Prezıdentiniń Qazaqstan halqyna úndeýine qatysty pikir bildirdi, dep habarlaıdy QazAqparat tilshisi.

«Qazir ǵana QR Prezıdenti Qasym-Jomart Kemeluly Toqaev halyqqa úndeý joldady. Kez kelgen eldiń turaqty damýynyń basty sharty – konstıtýtsııalyq tártip pen zań. Sondyqtan Memleket basshysy qazaqstandyqtardy tótenshe jaǵdaıdyń barlyq zańdy sharalaryn ustanýǵa shaqyrdy. Qazirgi tańda eń bastysy – elimizde konstıtýtsııalyq tártipti qalpyna keltirý», - dedi Erlan Saıyrov «QazAqparat» tilshisine telefon arqyly bergen pikirinde.

Onyń aıtýynsha, tek zań men quqyqtyq tártip aıasynda tabysty memleket týraly aıta alamyz.

«Biz úshin eń mańyzdy aspekt – egemendi jáne táýelsiz Qazaqstan. Elimizdiń azattyǵyn saqtaý úshin zańǵa baǵynyp, aqyl-oıymyzdy jıyp, túrli toptar arasynda zamanaýı dıalog júrgizýimiz kerek. Sondyqtan qazaqstandyqtardy Qazaqstan Respýblıkasynyń múddesine yqpal etip, zańdy tártipti saqtaýǵa shaqyramyn», - dep atap ótti depýtat.

«Barlyǵyn QR zańnamasy aıasynda dıalog júrgizýge shaqyramyn. Tek osylaısha elimizdiń turaqtylyǵyna jáne damýyna qol jetkize alamyz. Qazirgi ýaqytta memlekettiń eń basty urany – zań men aqyl-oı», - dep túıindedi E. Saıyrov.

Azamat Syzdyqbaev