Erlan Saırov saılaý týraly: Prezıdenttiń sheshimi mańyzdy ári qajetti dep esepteımin

NUR-SULTAN. QazAqparat - Qazaqstanda tranzıttik protsess turaqtylyq pen kelisim kezeńinde ótedi. 9 maýsymda elimizde kezekten tys ótetin prezıdenttik saılaý týraly saıasattanýshy Erlan Saırov osyndaı pikir bildirdi, dep habarlaıdy QazAqparat tilshisi.

«Qazaqstan Respýblıkasynyń Prezıdenti Qasym-Jomart Toqaevtyń úndeýin tyńdadyq. Bul sheshim - búgingi tańda mańyzdy ári qajetti dep aıtar edim. Memleket basshysy atap ótkendeı, biz ózgerisi qym-qýyt ári jyldam álemde ómir súrip jatyrmyz. Ózgerister protsesi óte tez bolyp jatyr. Sol sebepti, Qazaqstanda árdaıym ózindik saıası jiger men áleýmettik optımızm bolýy kerek. Bul rette kez kelgen memlekettiń saıası júıeniń evolıýtsııasy - zańdy protsess. Bizdiń Qazaqstanda tranzıttik kezeń turaqtylyq pen qoǵamdyq kelisim kezeńinde óter dep esepteımiz», - deıdi Erlan Saırov.

Eske sala ketsek, aǵymdaǵy jyldyń 9 maýsymynda elimizde kezekten tys prezıdenttik saılaý ótedi. Bul týraly búgin respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty.

Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.