Erlan Saırov: Klebanov tárizdilerdiń múddesi úshin sińir kedeılerdi qanaý kúpirlik

<p>Premer-Mınıstrdiń birinshi orynbasary Roman Sklıarǵa depýtattyq saýal joldaǵan Májilis ókili Erlan Saırov qysy-jazy saıajaıda turatyn adamdardy arnaıy esepke alýdy usyndy, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Úkimet «Tarıfke ınvestıtsııa aıyrbas» prıntsıpin iske asyrǵanda halyqtyń qaltasy jutań ekenin eskerýge tıis. Turǵyn úı kómegi toqsan saıyn tólenedi. Árbir toqsanǵa ortasha eseppen 20 myń teńge. Onyń ózin naǵyz muqtaj adamdar ala almaıdy. Óıtkeni bul ótemdi alý úshin menshik úıiń nemese memleketten jalǵa alǵan úıiń bolý kerek. Onyń ózinde ondaǵan qujat toltyrý qajet. Eń bastysy, úı-kúıi joq, páter jaldap júrgen ondaǵan myń naǵyz muqtaj azamatqa memleket kómeginiń jurnaǵy da tımeıdi. Olar memlekettiń esebinde múldem joq. Tarıfterdiń ósýinen qınalatyn, ótemaqyǵa zárý osy kisiler. Klebanov tárizdilerdiń bıznesi júrmeı qalady dep sińir kedeılerdi qanaı berý kúpirlik bolady», - dedi depýtat.

Onyń paıymynsha, Úkimet «Tarıfke ınvestıtsııa aıyrbas» reformasy kezinde myna máselelerge nazar aýdarý kerek.

«Tarıfterdiń qymbattaýyna baılanysty tólemaqynyń somasyn arttyrý qajet. Bul tólemaqyny naǵyz muqtaj, qalada óziniń baspanasy joq, páter jaldap turatyn azamattardyń alýyna normatıvtik tetikter jasaý kerek. Baspanasy joq, páter jaldap júrgen azamattardy statıstıka málimetterine engizip, olardyń áleýmettik jaǵdaıyna monıtorıng jasaıtyn ádisteme engizý qajet. Búginde páter jaldap, saıajaıda turyp jatqan azamattarǵa memlekettik áleýmettik kepildeme alatyn júıe jasaý kerek. Olar – bizdiń azamattarymyz. Bul azamattar bir de bir statıstıka málimetterine tirkelmegen. ıAǵnı, ol adamdar memlekettiń esebinde múldem joq. Olarǵa nazar aýdarmaý erteń áleýmettik, saıası táýekelge ákelýi yqtımal», - dedi Erlan Saırov.