Erlan Saırov: Qazaqstanda áleýmettik damýdyń ózindik modeli qurylýda

ASTANA. QazAqparat - Qazaqstanda áleýmettik damýdyń ózindik modeli qurylýda. Búgin Parlament palatalarynyń birlesken otyrysyndaǵy Elbasynyń Úndeýine baılanysty pikir bildirgen áleýmettanýshy, QR Kásipodaqtar federatsııasy tóraǵasynyń orynbasary Erlan Saırov osylaı málim etti. Eske salaıyq, Parlament palatasynyń birlesken otyrysynda Nursultan Nazarbaev «Prezıdenttiń bes áleýmettik bastamasyn» jarııa etken edi, dep habarlaıdy QazAqparat.

Erlan Saırovtyń aıtýynsha, búgingi álemde áleýmettik teńsizdiktiń ósý qarqyny baıqalady. Adamzattyń basym bóligi qarapaıym materıaldyq ıgilikterge qol jetkize almaı júr. Sondyqtan búgingi basty mindet - áleýmettik máselelerdi memlekettik turǵydan retteý bolmaq.

«Eń bastysy, ár azamat ózin búkil qoǵamǵa berilgen materıaldyq ıgilikten qur qalmaǵanyn sezinýi tıis. Bul - durys baǵyt, ádil ustanym. Elimiz osy baǵytqa bet burdy. Osy oraıda Elbasy Nursultan Nazarbaevtyń Parlament palatalarynyń birlesken otyrysyndaǵy baıandamasy barshamyzdy qýantty. Baıandamada bes áleýmettik bastama týraly aıtyldy. Árqaısysy jeke-jeke qarastyrýǵa laıyqty», dep atap ótedi Erlan Saırov.

Onyń aıtýynsha, Elbasy bastamasyndaǵy qazaqstandyqtar úshin qoljetimdi baspana - basty másele.

«Kóptegen jas otbasy jekemenshik úıiniń bolmaýynan qınalady, tipti keıbir otbasylardyń shańyraǵynyń shaıqalýyna da osy másele áser etedi. Bul rette memleket tarapynan azamattardyń basym bóligine derlik baspanany qoljetimdi etý bastamasy kóterilip otyr. «7-20-25» baǵdarlamasy atalǵan problemany jaqyn arada sheshýge múmkindik beredi. Osy baǵdarlamany oryndaý ekonomıkany damytýda ǵana emes, demografııany kóterýge de qarqyn beredi. Óıtkeni demografııaǵa ınvestıtsııa quıý óte ózekti. Al salyqtyq júktemeni tómendetý maqsatynda jalaqyny az alatyn adamdarǵa salyq 1 paıyzǵa deıin tómendeıdi. Bul álemdik tájirıbede bolmaǵan sheshim. Bastysy, únemdelgen qarjy osy sanattaǵy adamdardyń eńbekaqysyn kóterýge jumsalady. Bul - 2 mıllıonnan astam azamattyń tabysyn arttyrýǵa jasalǵan qadam», dep atap ótedi áleýmettanýshy.

Budan bólek, ol tehnıkalyq mamandyqtarǵa granttardy kóbeıtý máselesin de der kezinde qabyldanǵan mańyzdy sheshim retinde qarastyrady.

«Eńbek naryǵynyń ózgerýin esepke alsaq, bul tórtinshi ónerkásiptik revolıýtsııa jolyndaǵy mańyzdy qadam. Ózin ózi jumyspen qamtýshylar máselesin sheshýde eldiń áleýmettik jańǵyrýyna bazalyq jaǵdaı jasalyp otyr. Osy baǵytta 14 myń azamatqa 62 mıllıard teńge kóleminde shaǵyn nesıe beriledi. Bul aýyl turǵyndaryn shaǵyn kásipkerlikpen qamtýǵa múmkindik beredi. Ózin ózi jumyspen qamtýshylardyń máselesin keshendi túrde sheshý olardy elimizdiń ekonomıkalyq aınalymyna qosýǵa, salyq bazasynyń keńeıýine jol ashady. Bul el ekonomıkasyn damytýdyń mańyzdy qyrlarynyń biri. Áleýmettik damýdyń negizgi belgileri aýyl ınfraqurylymy, eldi-mekenderdiń basym bóligin gazben qamtamasyz etý. Elbasy baıandamasynda el ishinde kógildir otyndy jetkizýde jańa baǵyttar qurý, gaz qubyrlary qurylysyn júrgizý týraly aıtyldy. Bul másele burynnan sarapshylar deńgeıinde talqylanyp kele jatqan bolatyn. Sondyqtan memlekettiń azamattyq qoǵam ókilderiniń oı-pikirimen úndese jumys isteýi qýantady. Sol sebepti elimizde memlekettiń azamattardyń keleshegine qamqorlyǵy men áleýmettik jaýapkershiligi is júzinde oryndalady dep senimmen aıtýǵa bolady. Bul qoǵamdaǵy áleýmettik senimniń artýyna alyp keledi. ıAǵnı Qazaqstanda áleýmettik damýdyń ózindik modeli qurylýda», - dep atap ótedi Erlan Saırov.