Erlan Saırov: Qaıta qurylatyn shekaralyq aýdandarda muǵalim men dáriger jalaqysyna ústeme tóleý kerek

ASTANA. QazAqparat – Májilis depýtaty Erlan Saırov Prezıdent Qasym-Jomart Toqaevtyń Ulttyq quryltaıda shyǵystaǵy úsh birdeı shekaralyq aýdandy qaıta qurý týraly sheshimine baılanysty pikir bildirdi, dep habarlaıdy QazAqparat tilshisi.

«Memleketimizdiń ulttyq qaýipsizdiginiń eń negizgi aspektileri – osy shekaralyq aýdandardy túzeý. Óıtkeni búgin dúnıejúzinde halyqaralyq quqyqty moıyndamaıtyn memleketter paıda boldy. Sondyqtan bizde bos terrıtorııa bolmaý kerek. Aımaqtardyń bárin halyqpen toltyrýymyz kerek. Ol úshin memlekettik retteý bolý qajet.

Mysaly, Katonqaraǵaı men Marqakólden halyq kóship ketken. Azamattardyń kóbi ol jaqtan aýdan jabylǵannan keıin kóship ketkenderin aıtyp júr. Sondyqtan endi aýdan ashylǵannan keıin ol jaqtaǵy mádenıet pen bilimdi kóterip, azamattarǵa sapaly jumys ornyn berip, sonyń negizinde kóship ketken azamattardy qaıtarýdyń amalyn jasaý kerek. Prezıdent Qasym-Jomart Toqaevtyń bul qadamy ulttyq qaýipsizdikti qamtamasyz etýdiń basty aspektileriniń biri», - dedi Májilis ókili.

Sondaı-aq ol keıingi shırek ǵasyrdyń ishinde jaıly ómir izdep shekaralyq aýdandardan údere kóshken halyqty baıyrǵy qonystaryna qaıtarý úshin ne isteýge bolatynyn aıtty.

«Halyqty qaıta kóshirý úshin sondaǵy bilim, mádenıet, medıtsına salasynyń ókilderiniń aılyǵyna ústemeaqy qosyp tóleý kerek. Onyń bárin zań boıynsha retteýge bolady.

Eń negizgisi, sol jaqtarda shaǵyn jáne orta bıznesti damytý úshin memlekettik baǵdarlama kerek. Ony Úkimetpen birge ázirleımiz», - dedi depýtat.

Eske salaıyq, búgin Memleket basshysy Túrkistandaǵy Ulttyq quryltaıda Shyǵys Qazaqstan oblysyndaǵy Katonqaraǵaı jáne Marqakól aýdandaryn, Abaı oblysyndaǵy Maqanshy aýdanyn qaıta qurý týraly sheshim qabyldaǵanyn málimdedi.