Erlan Saırov: Halyq ákim saılaýynda jastarǵa basymdyq berdi
«Bul bizdiń elimizdiń saıası tarıhyndaǵy úlken bir beles dep aıtýǵa úlken negiz bar. 30 jyldyń ishinde Qazaqstan halqy óziniń ákimderin tikeleı saılap alý quqyǵyna ıe bolyp otyr. Bul birinshiden, halqymyzdyń saıası mádenıetin ósirýge alyp keledi. Ekinshiden, aımaqtarda saıası plıýralızmniń damýyna óte tereń irgetes qalaıtyny anyq. 15 kúndeı aımaqtardy aralap qaıttyq. Sol kezde aýyl ákimderin saılaý protsesine jan-jaqty saraptama jasadyq. Halyqtyń qyzyǵýshyly óte joǵary. Shynyn aıtý kerek, qazaq óz taǵdyryna kelgende óte jaýapty qaraıdy», - deıdi depýtat.
Ulttyq keńes múshesi mundaı qyzyǵýshylyq, meniń oıymsha, tipti Parlament saılaýy kezinde de bolmaǵanyn aıtady.
«Óıtkeni aýyl azamattary ákimge daýys berý arqyly óziniń bolashaǵyn, aýyldyń damý jolyn saılaıtynyn túsingendikten, bul naýqanǵa óte jaýapty keldi. Sonymen birge, kandıdattarǵa degen nazary da erekshe boldy. Meniń túsingenim, óz ishterinen kandıdat usynbas buryn árbir aýylda ózinshe bir praımerız bolǵan. ıAǵnı, kim laıyqty degen máseleden bastaǵan saılaýǵa jumylýdy. Laıyqty adamdardyń ishinde de suryptaý bolǵan. Qazir aıtyp jatyrmyz ǵoı, 2 298 kandıdat boldy dep. Negizinde kandıdattardyń tizimi 5-6 myńnan da asqan. Sonyń ishinde iriktelgenderi ǵana tirkeýge qatysqan», - deıdi Májilis ókili.
Erlan Saırov osy saılaýda aýyl halqynyń jastarǵa úmit artatynyn aıryqsha baıqaǵanyn aıtady.
«Taǵy bir ereksheligi, saılaýshylardyń ózderi jastarǵa oryn berýimiz kerek degen talapty alǵa tartty. Meni sol tańǵaldyrdy. ıAǵnı, halyqtyń ózi jastar istesin degen talap qoıyp, shek belgiliep tastaǵan. Bul esh jerde jazylǵan zań bolmasa da, ishki ustanymdaryn osylaı qalyptastyrǵan. Mysaly, keshe men Mańǵystaý oblysynyń Túpqaraǵan aýdanyndaǵy Aqshuńqyr aýylynda boldym. Sol jerdegi úmitker Erkebulan degen jigit 32-de eken. Onyń basty maqsaty – Aqshuńqyr aýylynyń ınfraqurylymyn janyndaǵy Aqtaýdyń deńgeıine jetkizý. Meniń oıymsha, osy saılaýdan keıin aýyl ákimderiniń jasy biraz jasarady», - deıdi sarapshy.