Erlan Saırov Eýropamen júk tasymalynyń qıyndaýynan bıznes shyǵynǵa batatynyn aıtty

NUR-SULTAN. QazAqparat – Májilistiń jalpy otyrysynda depýtat Erlan Saırov Eýropadan júk tasymalynyń qıyndaýyna baılanysty fermeler shyǵynǵa batatynyn aıtty, dep habarlaıdy QazAqparat tilshisi.

«Búgingi shıelenisti halyqaralyq jaǵdaı otandyq bıznes ókilderiniń múddesine keri áser etýde. Shıelenis aımaǵynda qazaqstandyq kásipkerlerge tıesili 1007 júk vagony turyp qalǵan, 680 júk vagony shıelenis aımaǵyna jetpeı toqtatylǵan. Tranzıt quny eki esege ósip ketken. Logıstıkanyń buzylýyna baılanysty Eýropadan elimizge keletin tuqym, tyńaıtqysh, ósimdikterdi qorǵaý quraldaryn jetkizý qıyndap ketken. Kóktemgi egistik jumystaryna tutynýǵa qajetti aýqymnyń 50-paıyzy ǵana jetkiziledi degen boljaý jasalýda. Al, ımporttan keletin ósimdikti qorǵaý quraldary egistikke qajet deńgeıdiń 90-paıyzyn quraıdy. Otandyq bıznes ókilderi júzdegen mıllıon teńge shyǵynǵa ushyraýda. Úkimet qımyldap jatyr, biraq myna zamanda óte shıraq bolý mańyzdy», - dedi E. Saırov Úkimet basshysy Álıhan Smaıylovtyń atyna joldaǵan saýalynda.

Osy oraıda ol elimizdiń bıznesi kóptegen halyqaralyq saýda brendilermen Reseı arqyly jumys istegenin atap ótti.

«Ol brendiler kórshimizden jappaı shyǵyp jatyr. Munaı tasymaldaýdyń da problemasy qyltıyp tur. Nege Úkimet kezinde munaı tasymaly, saýda brendteriniń balama logıstıkasyn oılastyrmaǵan?! Reseı rýbliniń tez bosańsýy bizdiń elimizge kórshimizden azyq-túliktiń ımportynyń eselep ósýine alyp kelýi múmkin. Bul óz kezeginde qazaqstandyq azyq-túlik óndirýshilerdiń jaǵdaıyn múldem turalatyp jiberýi yqtımal. «Jyǵylǵan ústine judyryq» bolyp halqymyzdy baǵa men devalvatsııa alqymnan qysyp jatyr. «AMANAT» partııasynyń saılaýshylary osy máseleler boıynsha alańdaýly», - dedi depýtat.

Osy turǵyda ol tıisti suraqtaryn joldady:

1. Qazaqstannyń tasymal logıstıkasyn ártaraptandyrýǵa qandaı qadamdar jasalýda?

2. Halyqaralyq saýda brendteriniń Qazaqstanmen tikeleı jumys isteýin qamtamasyz etý úshin ne istelip jatyr ?

3. Munaı tasymalyn ártaraptandyrýǵa qandaı áreket jasalýda ?

4. Jalpy, týrbýlenttilik kezeńinde, Qazaqstannyń ekonomıkalyq múddesin qorǵaýdyń jańa fılosofııasy bar ma?

«Osy máseleni zańda belgilengen merzimde qarastyryp, jaýap berýińizdi suraımyz»,-delingen depýtattyń saýalynda.