Erlan Saırov bilim berý salasynda psıhologtardyń shtatyn kóbeıtýdi usyndy
Qazaqstan Respýblıkasynyń basty qundylyǵy adam jáne adamnyń ómiri. Osy turǵyda, «Nur-Otan» partııasynyń saılaýaldy baǵdarlamasynda «Otbasyn qoldaý jáne nyǵaıtý – elimizdiń tabysty damýynyń kepili» dep aıqyndalǵan. Búginde, jahandaný protsesterinen týyndaǵan aqparattar leginiń eselep ósýine baılanysty, halqymyzdyń rýhanı kodyn saqtaý, bala tárbıeleýdiń ulttyq formaty deformatsııaǵa ushyrap barady. Adamdy, dástúrli januıa ınstıtýtyn qorǵaıtyn ýaqyt jetti jáne kezek kúttirmeıtin mańyzdy másele», - dedi E. Saırov.
Onyń aıtýynsha, «Nur-Otan» partııasynyń saılaýaldy baǵdarlamasynyń «Baqytty otbasy» pýnktin is júzine asyrǵan kezde tıisti qadamdarǵa nazar aýdarý qajet.
«Azamattarǵa keshendi psıhologııalyq kómek kórsetý tetigin jaqsartý, sonymen birge, ata-analarǵa quqyqtyq, rýhanı, ádistemelik qoldaý kórsetetin «Januıany qoldaý ortalyqtary» ınstıtýtyn qura otyryp, ata-anany qoldaý tetikterin qarastyrý óte ózekti. Bul rette balalardy qazirgi ýaqyttyń talabyna saı tehnologııalyq baǵytqa erekshe den qoıa otyryp, ulttyq dástúrli qundylyqtar aıasynda oqýshylardyń adamgershiligi men moraldik kelbetin qalyptastyra otyryp tárbıeleý, balalar men ata-analarǵa qıyn joldan birlesip shyǵýǵa jol kórsetý máselesi aldyńǵy qatarda bolýy qajet. Azamattardyń óziniń ata-analyq mıssııasyn tolyqqandy oryndaýyna jaǵdaı jasaý maqsatynda Eńbek kodeksiniń baptary naqty oryndalýy basty mindet.
Ata-analardyń bala tárbıeleýge ýaqyty, jaýapkershiligi jáne qaýqary bolýy tıis», - dedi depýtat.
Onyń paıymynsha, pedagogtardyń jáne ata-ananyń balabaqsha, mektep jasyndaǵy balalardy ulttyq qundylyq aıasynda tárbıeleý fýnktsııasyn keńeıtken abzal. Osy oraıda balalardy tárbıeleýdegi mektep pen ata-analardyń birlesken jaýapkershiligin arttyratyn jańa formatqa kóshý óte mańyzdy. Psıhologtardyń kásibı daıyndyǵynyń bilim berý baǵdarlamalarynyń mazmunyn jetildirý qajet.
«Bilim jáne ǵylym mınıstrligi balalardyń durys jáne turaqty psıhoemotsıonaldyq jan-jaqty damýynyń mazmundy biryńǵaı baǵdarlamalaryn ázirleýin qolǵa alǵany abzal. Jumys istep turǵan Keshendi psıhologııalyq qyzmetterdiń tıimdiligin arttyryp, olardyń jumysyna qoǵamdyq monıtorıng jasaı otyryp, baǵyt-baǵdaryn keń aýqymdy qoǵam baqylaýynda ustaǵan jón. Bilim berý salasynda psıhologtardyń shtatyn kóbeıtýdi usynamyz. Áleýmettik jelide jasóspirimderdi sýıtsıdke ıtermeleıtin aqparatty tejeýdiń utymdy tetigin qalyptastyrý, táýekeli joǵary balalarǵa aldyn alý is-sharalaryn jasaýdyń praktıkasyn engizý tetigin qarastyrý ózekti», - dedi E. Saırov.