Erlan Saırov: Beıbit jıyndar týraly zań jobasy lıberalızatsııa jaǵyna ózgerip jatyr

NUR-SULTAN. QazAqparat – Saıasattanýshy, Ulttyq qoǵamdyq senim keńesiniń múshesi Erlan Saırov «QR-da beıbit jıyndardy uıymdastyrý jáne ótkizý tártibi týraly» zań jobasy qalaı jetildirilip, qujatqa qandaı ózgerister engizilip jatqanyn aıtyp berdi, dep habarlaıdy QazAqparat tilshisi.

«Bul zań jobasynyń eń alǵashqy jáne qazirgi nusqasynyń arasyndaǵy aıyrmashylyq jer men kókteı. Ózderińiz biletindeı, Memleket basshysy Qasym-Jomart Toqaevtyń tikeleı nusqaýy boıynsha 250 adam (mıtıngke qatysýshylar sany – red.) jónindegi shekteý alynyp tastalǵan bolatyn. Májiliske túskennen keıin bul zań lıberalızatsııa jaǵyna ózgerip jatyr. Aqparat jáne qoǵamdyq damý mınıstrligi bul máselemen tikeleı aınalysýda», - dedi Erlan Saırov QazAqparat tilshisine.

Saıasattanýshynyń aıtýyna qaraǵanda, zań jobasynda jýrnalısterge qatysty shekteýler barynsha alynyp tastalǵan. Sonymen birge mıtıngtiń ótetini jaıly bılikti qulaqtandyrý merzimi 15 kúnnen 10 kúnge deıin qysqardy. Odan bólek pıketterdi ótkizýdi de lıberalızatsııalaý máselesi keńinen pysyqtalýda.

«Ulttyq keńestiń músheleri depýtattarǵa bul zańnyń tárbıelik máni jáne osy zańdy qoldanýshylarǵa yńǵaıly etý jaǵyn da qarastyrý týraly ótinish aıtty. Keshe zańdy ázirleýshi músheler – Evgenıı Jovtıs, Muhtar Taıjan, Murat Ábenov, ózim bar depýtattarmen taǵy bir ret onlaın-konferentsııa ótkizdik. Meniń oıymsha, qazirgi tańda zańnyń qarastyrylýy – búgingi qoǵamdyq tendentsııaǵa sáıkes keledi», - dedi ol.

Eske sala ketsek, osy jyldyń aqpan aıynda Qazaqstan Prezıdenti Qasym-Jomart Toqaev qoǵam talqylaýyna túsken beıbit jıyndardy ótkizý tártibi týraly zań jobasyna pikir bildirgen edi. Memleket basshysy beıbit mıtıngilerge qatysýshylar sanyn 250 adammen shekteýdi jónsiz dep sanaıtynyn aıtty.