Erlan Saǵadıev «bolashaqtyqtar» qandaı salalarda eńbek etetinin aıtty
«Qazirgi tańda «Bolashaq» baǵdarlamasy boıynsha 1100 stıpendıat oqyp jatyr. Sózsiz, shırek ǵasyrlyq tarıhynda «Bolashaq» stıpendııasy óziniń damýynyń birneshe kezeńin basyp ótkeni anyq. Baǵdarlamanyń negizgi baǵyttary men talaptary ýaqyt ótken saıyn jetildirilip, ulttyq ekonomıkanyń qajettiligine, memlekettik saıasattyń basymdyǵy men zamannyń baǵdaryna qaraı beıimdele tústi. 25 jyldyń ishinde «Bolashaq» - qazaqstandyq bilimniń tabysty brendine aınaldy. «Bolashaq» stıpendııasynyń nátıjeliligin halyqaralyq sarapshylar da aıryqsha atap ótýde. Baǵdarlamanyń tájirıbesi tereńirek zerttelip, ózge elderge úlgi bolarlyq dárejege jetti. Baǵdarlamanyń aýqymdy spektriniń, daıarlyǵynyń baǵyty men JOO geografııasynyń arqasynda «Bolashaq» stıpendııasy Maıamı qalasynda ótken Going Global halyqaralyq konferentsııasynda ózine uqsas 11 stıpendııanyń úzdigi atandy», - dedi Erlan Saǵadıev.
Mınıstr óz sózinde «Bolashaq» stıpendııasynyń arqasynda biliktiligi joǵary mamandardyń, kreatıvti ǵalymdar men ınjenerlerdiń, dárigerler men basqarýshylardyń shoǵyry paıda bolǵanyn tilge tıek etti.
«Jetekshi ǵylymı-ortalyqtarda bilim alýdyń arqasynda stıpendıattar elimizge álemdik tehnologııalardy ákelýge, halyqaralyq qarym-qatynastardy jolǵa qoıýǵa, halyqaralyq qaýymdastyqtarǵa ıntegratsııalanýǵa jol ashty. Ekinshi jaǵynan stıpendııa túlekteri sheteldegi Qazaqstannyń aınasyna jáne elshisine aınaldy. «Bolashaq» stıpendıattarynyń arqasynda álem halqy Qazaqstandy tanı tústi. Búgingi tańda bolashaqtyqtar óz salasynyń bilikti jetekshileri bolyp otyr.Túlekterdiń 40 paıyzy ekonomıkanyń túrli sektorlarynda eńbek etse, 20 paıyzy bilim jáne ǵylym salasynda, 7 paıyzy medıtsına salasynda júr. Túlekterdiń tórtten biri iri kompanııalar men memlekettik uıymdardyń top-menedjerleri atandy. Bolashaqtyqtardyń úlesinde júzdegen ǵylymı eńbekter men iri áleýmettik jobalar barshylyq. «Bolashaq» óziniń tarıhı mıssııasyn keremet oryndap berdi. Aldaǵy ýaqytta «Bolashaq» stıpendııasynyń túlekteri elimizdiń órkendeýine óz úlesin qosa berer degen senimdemin», - dedi Erlan Saǵadıev.
Memlekettik hatshysy Gúlshara Ábdiqalyqova «Bolashaq» halyqaralyq stıpendııasynyń 25 jyldyǵyna arnalǵan forýmda Prezıdent Nursultan Nazarbaevtyń stıpendıattarǵa joldaǵan quttyqtaý hatyn oqyp bergen bolatyn. Elbasy óz sózinde atap ótkendeı, «Bolashaq» halyqaralyq stıpendııasy dúnıejúzine tanylǵan qazaqstandyq brendke aınaldy.