Erlan Saǵadıev: Bıyl 1-2 synyp oqýshylaryn qosymsha dápterlermen 100 paıyz qamtamasyz etemiz

ASTANA. QazAqparat - Bıyl 1-2 synyp oqýshylaryn qosymsha dápterlermen 100 paıyz qamtamasyz etý josparlanyp otyr. Bul týraly búgin Úkimet úıinde «100 naqty qadam» Ult josparynyń áleýmettik jáne bilim salalarynda júzege asyrylýyna arnalǵan brıfıngte QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat.

«Zań boıynsha Úkimet oqýlyqtardy  satyp alyp, balalardy 100 paıyz qamtamasyz etedi. Biraq, dápterge kelgende birinshi synypqa ǵana alynady. 1 synyp balalaryna dápterler 100 paıyz alynady.  Bıyl 1-2 synyp oqýshylaryn dáptermen 100 paıyz qamtamasyz etemiz dep otyrmyz. Alaıda, oǵan qarjy áli bólingen joq. Basqa synyptardy dáptermen qamtamasyz etý jergilikti ákimdikter sheshetin másele. Zań boıynsha biz Úkimet esebinen  tek oqýlyqtardyń aqshasyn bólemiz», - dedi Saǵadıev BAQ ókilderiniń saýalyna oraı.

Aıta keteıik, qazirgi ýaqytta oqýshynyń ár pánine qosymsha dápterler shyǵarylǵan. Máselen, ótken jyly úsh bólimnen turatyn orys mektepterine arnalǵan 1 synyptyń jazý úlgisi  - 1050 teńge, qazaq tilinen 2 jumys dápteri 1000 teńge, matematıkadan 2 jumys dápteri 1200 teńge, 2 jazý úlgisi 1000 teńge, eńbekke baýlý 2 jumys dápteri 1200 teńge bolǵan edi.