Erlan Saǵadıev 100 paıyz qazaq tilinde baıandama jasaýǵa ýáde berdi

ASTANA. QazAqparat -QR Bilim jáne ǵylym mınıstri Erlan Saǵadıev kelesi Úkimet otyrysynda taza qazaq tilinde baıandama jasaýǵa ýáde berdi, dep habarlaıdy «QazAqparat» HAA tilshisi.

«95 paıyz qazaqsha boldy (búgingi Úkimet otyrysyndaǵy baıandamasy - avt.) Endi qazir onyń bárin jasap jatyrmyn. Keleside 100 paıyz qazaqsha jasaımyn», - dedi ol Úkimet otyrysynan keıin BAQ ókilderiniń suraǵyna jaýap berip.

Erlan Saǵadıev sonymen birge 2020 jyly mektepterde engizilgeli otyrǵan «nólinshi» synyp týraly aıtyp berdi.

«2020 jyly nólinshi synyp engiziledi. Daıyndyq barysy aıtyldy. Eki jyldyń ishinde nólinshi synypty engizemiz. Qazir kópshilik balabaqshalarda, mektepterde bar (nólinshi synyp - avt.) 85 paıyz nólinshi synyptar qazirgi ýaqytta balalar oqyp jatyr. Josparymyz - 100 paıyz balalardy ótkizý. Ol birinshiden. Ekinshiden biryńǵaı baǵdarlamasyn engizý. Kóp ózgeris joq, tek qana álipbı latyn tilinde bastalady. Eń aldymen álippeni qabyldadyq. Endi oqýlyqtardy daıyndaý kerek. Ony saraptamadan ótkizip, sodan keıin aprobatsııaǵa kirisemiz», - dedi mınıstr.