Erlan Qoshanov jańadan taǵaıyndalǵan Ǵylym mınıstrine qatysty pikir bildirdi

NUR-SULTAN. QazAqparat – Saıasat Nurbek az ýaqyt ishinde Májilistegi zań shyǵarý isine zor úlesin qosty. Bul týraly palatanyń jalpy otyrysynda Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Áriptesimiz Saıasat Nurbek Memleket basshysynyń sheshimimen Ǵylym jáne joǵary bilim mınıstri bolyp taǵaıyndaldy. Prezıdent osy vedomstvoǵa úlken mindet júktep otyr. Sondyqtan áriptesimizge osy qyzmetinde sáttilik tileıik. Parlamentte az ǵana ýaqyt qyzmet etse de, zań shyǵarý isine zor úlesin qosty dep oılaımyn. Óte tanymal depýtat boldy», - dedi E.Qoshanov.

Osy oraıda palata otyrysynda S.Nurbekke Alǵys hat tabystaldy.

Óz kezeginde Ǵylym jáne joǵary bilim mınıstri Parlament depýtattarymen tyǵyz qarym-qatynasta jumys isteıtinin aıtty.

«Maǵan úlken jaýapkershilik júktelip otyr. Referendýmnan keıin «Jańa Qazaqstandy» quramyz dep jatqanda, tuńǵysh taǵaıyndalǵan mınıstr boldym. Bul rette eki ese jaýapkershilikti sezinip otyrmyn. Bilim men ǵylym, aǵartý isi, jastarymyzdyń bilimi jáne joǵary oqý oryndarymyz myqty ári halyqaralyq standarttarǵa saı bolýyn qalaımyn. Barshamyz birge elimizdiń ǵylymyn kótereıik. Sizderdiń qoldaýlaryńyz óte mańyzdy», - dedi Saıasat Nurbek.

Budan buryn habarlanǵandaı, Búgin Parlament Májilisiniń jalpy otyrysynda depýtat Saıasat Nurbektiń ókilettigi merziminen buryn toqtatyldy.

Ol Ǵylym jáne joǵary bilim mınıstri laýazymyna taǵaıyndaldy.