Erlan Qoshanov UQShU Parlamenttik Assambleıasynyń is-sharalaryna qatysty

<p>Májilis tóraǵasy Erlan Qoshanov bastaǵan Parlament delegatsııasy Máskeýde Ujymdyq qaýipsizdik týraly shart uıymy Parlamenttik Assambleıasy keńesiniń kezekti otyrysy men jalpy otyrysyna qatysty, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;&nbsp;</a></p>

Erlan Qoshanov óz sózinde Qazaqstannyń 2024 jyly Ujymdyq qaýipsizdik týraly sharty uıymynda tóraǵalyǵy kezeńindegi basymdyqtary jaıly aıtty. 

Foto: T.Tanybaev

«Ózderińizge belgili, 2024 jyldyń 1 qańtarynda Qazaqstan Ujymdyq qaýipsizdik týraly sharty uıymyna tóraǵalyqty qabyldaıdy. Mınskide ótken Ujymdyq qaýipsizdik keńesiniń qarashadaǵy sessııasynda Qazaqstan Prezıdenti Qasym-Jomart Toqaev Qazaqstan tóraǵalyǵynyń basym baǵyttaryn atap ótti», – dedi Májilis spıkeri.

Basymdyqtardyń qatarynda UQShU-nyń múddeli eldermen jáne qaýipsizdik salasynda jumys isteıtin halyqaralyq qurylymdarmen, sonyń ishinde BUU, TMD jáne Shanhaı yntymaqtastyq uıymymen seriktestikti tereńdetý máseleleri bar. Áskerı kadrlardy daıarlaý júıesin, uıymnyń áskerı-ǵylymı jáne bitimgershilik áleýetin damytý bóliginde normatıvtik-quqyqtyq bazany jetildirýdiń mańyzy zor.

Sondaı-aq qarý-jaraqtyń, oq-dárilerdiń, esirtkiniń zańsyz aınalymyna qarsy birlesken jumysty kúsheıtý josparlanyp otyr. UQShU jaýapkershiligi aımaǵyndaǵy tótenshe jaǵdaılardyń, kıberqylmystyń aldyn alý jáne olardyń saldaryn joıý jónindegi praktıkalyq yntymaqtastyqty damytýǵa erekshe nazar aýdarylady. 

Foto: T.Tanybaev

Erlan Qoshanov UQShU Parlamenttik Assambleıasynyń uıymǵa múshe memleketterdiń múddelerin eskere otyryp, ulttyq zańnamasyn damytý men úılestirýge qosqan úlesin atap ótti. Sondaı-aq Májilis tóraǵasy qatysýshy elderdiń parlamentteri arasyndaǵy tıimdi yntymaqtastyqtyń aıqyn mysaly retinde Parlamenttik Assambleıanyń turaqty komıssııalarynyń qyzmetine toqtaldy.

«Qazaqstannyń tóraǵalyǵy kezeńinde birlesken kúsh-jigermen jáne UQShU men onyń Parlamenttik Assambleıasynyń jumys organdarynyń saraptamalyq qoldaýynyń arqasynda biz ujymdyq qaýipsizdik júıesin nyǵaıtý isinde jemisti jumys isteıtinimizge senimdimin», – dedi Erlan Qoshanov.