Erlan Qoshanov Prezıdent tapsyrmasy boıynsha Bas prokýratýraǵa tıisti usynys jasady
Atap aıtqanda, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaralyp, maquldandy.
«Zań jobasynda (búgin Májiliste qaralǵan «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy) kadrlyq másele, quqyq qorǵaý organdaryn materıaldyq qamtamasyz etý máseleleri, sondaı-aq áleýmettik qorǵaý baǵyttary qaralǵan. Biraq qańtardaǵy qaıǵyly oqıǵada quqyq qorǵaý organdarynyń fýnktsııalary jáne ókilettiligi zańnamalyq jaǵynan jetkiliksiz rettelgeni baıqaldy. 11 qańtarda Prezıdent Májilis otyrysynda sóılegen sózinde úsh blok boıynsha zańdarǵa túzetýler engizý týraly tapsyrma bergen bolatyn. Birinshisi, qarý-jaraq aınalymyna qatysty qoıylatyn talaptardy qatańdatý edi. Ekinshisi, bılik ókilderine shabýyl jasaǵany jáne zańdy talaptarǵa baǵynbaǵany úshin jaýapkershilikti kúsheıtý máselesi. Úshinshisine toqtalsaq, kúshtik qurylymdardyń sheshim qabyldaý kezindegi derbestigi, basshylardyń jaýapkershiligi. Sodan beri bir aı ótti, osy oraıda zań jobasy qaıda? Májilistiń qaraýyna qashan engiziledi?», - dep surady E. Qoshanov.
Óz kezeginde QR Bas prokýrorynyń orynbasary Áset Shyndalıev tıisti zań jobalary ázirlengenin, onyń bireýin Іshki ister mınıstrligi, al ekinshisin Bas prokýratýra daıarlaǵanyn jetkizdi.
«Qazir zań jobalary ókiletti organdarda kelisýde jatyr. Ol qujattar boıynsha tıisti jumystar atqarylyp jatyr, jaqyn arada Parlmentke joldaımyz... Bekitilgen jospar boıynsha maýsym aıy belgilengen, biraq biz jumystardy tezdetip jatyrmyz», - dedi Á. Shyndalıev.
Bul jaýapqa qatysty Májilis tóraǵasy tıisti usynys jasady.
«Sizder sáýirde nemese maýsymda (zań jobalaryn) engizesizder. Ol odan keıin qyrkúıek aıynda jalpy otyrysta qarala bastaıdy. Sodan keıin Senattyń talqylaýyna engizilip, jyldyń aıaǵyna deıin jalǵasady. Sonda, Prezıdenttiń tapsyrmasyn bir jyl ýaqytta oryndaımyz. ıAǵnı bul másele bir jyldyń ishinde ózekti bola ma?! Oǵan deıin qandaı oqıǵalar bolýy múmkin? Sondyqtan tıisti usynysty jasaımyn. Búgingi zań jobasyn birinshi oqylymda qarap otyrmyz, endi ekinshi oqylymǵa deıin tıisti ózgertýler men tolyqtyrýlardy engizińizder. Ekinshi oqylymda osy zańnyń ishinde atalǵan máselelerdi birge qarap jiberý kerek. Sonda, Memleket basshysynyń tapsyrmalaryn jedel oryndaýǵa jaǵdaı jasalady», - dedi E. Qoshanov.
«Ekinshi oqylymǵa deıin tıisti túzetýlerdi daıyndaý kerek. Polıtsııany, quqyq qorǵaý organdaryn moraldyq turǵydan bolsyn qoldaýymyz kerek. Olar eki túrli shabýylǵa ushyrap otyr. Birinshiden, qańtar aıyndaǵy tártipsizdik kezinde shabýylǵa tap bolsa, ekinshiden, aqparattyq shabýylǵa ushyrap otyr. Al kerek kezinde bizdi qorǵaıtyn osy polıtsııa qyzmetkerleri. Sondyqtan biz bul suraqty jedeldetip, osy zań jobasyn tezirek qabyldap, Prezıdenttiń tapsyrmasyn oryndaýymyz kerek», - dedi Májilis tóraǵasy.