Erlan Qoshanov Májilistiń 2023 jylǵy jumysyn qorytyndylady
«Ózderińiz bilesizder, bıyl Májilis kóp jumys atqardy. Ótip bara jatqan jyl Qazaqstan Parlamentiniń naǵyz jańarý kezeńi boldy. Kóktemgi saılaý qorytyndysy boıynsha depýtattar quramy aıtarlyqtaı jańardy. Májiliske alty saıası partııa men birmandatty okrýgterden saılanǵan depýtattar keldi. Búginde Májilis túrli kózqaras pen saıası pikirler toǵysqan alańǵa aınaldy. Bul Prezıdentimizdiń saıası baǵdaryn júzege asyrý jolyndaǵy aıtýly qadam boldy. Munyń bári jumysymyzǵa tyń serpin berdi. Áriptester, sessııa bastalǵaly beri Palatanyń jumysynda barlyǵy 106 zań jobasy boldy. 36 zań qabyldanyp, Senatqa jiberildi. El Prezıdenti 26 zańǵa qol qoıdy. Zań shyǵarý jumysynda biz Prezıdenttiń saılaýaldy baǵdarlamasyn iske asyrýǵa, jyl saıynǵy joldaýlarynda aıtylǵan tapsyrmalaryn oryndaýǵa bar kúsh-jigerimizdi saldyq», - dedi E. Qoshanov.
Onyń aıtýynsha, Ádiletti Qazaqstannyń negizi – sapaly ári qoǵamǵa qajetti zańdar. Sonyń biri – zańsyz shyǵarylǵan aktıvterdi memleketke qaıtarý. Osy zańnyń arqasynda elge 1 trıllıon teńge kóleminde aktıv qaıtaryldy.
«Budan bólek, «Ulttyq qor – balalarǵa» zańy qabyldandy. Depýtattardyń bastamasymen jer qoınaýy týraly zańnamaǵa túzetýler engizildi. Endi jańadan ashylǵan barlyq iri munaı-gaz ken oryndarynyń 50 paıyz úlesi mindetti túrde memlekettiń menshiginde bolýy kerek. Bul zań Prezıdenttiń «Qazaqstannyń búkil tabıǵı baılyǵy halyqqa tıesili» degen konstıtýtsııalyq bastamasyn júzege asyrýǵa múmkindik beredi. Zııandy jumys jaǵdaılarynda eńbek etetin azamattardy áleýmettik qoldaý máselesi sheshildi. Sonymen qatar, bızneske úlken qoldaý bolatyn zańdy búgin qabyldadyq», - dedi Májilis tóraǵasy.
E. Qoshanov bıyl barlyq fraktsııanyń depýtattary óz saılaýshylarymen tyǵyz baılanysta bolyp, erekshe qarqynmen jumys atqarǵanyn aıtty. Májiliste turǵyndardyń kókeıinde júrgen ózekti máselelerdiń bári qaraldy.
«Bul mınıstrlerge qoıylǵan suraqtarda da, zań jobalaryn talqylaý kezinde de, depýtattyq saýaldarda da anyq baıqaldy. Prezıdentimiz aıtqandaı, pikirtalas, dıskýssııa kóshede emes, Parlament qabyrǵasynda bolýy kerek. Sol bastama iske asyp jatyr. Sessııa barysynda barlyǵy 233 depýtattyq saýal joldandy. Parlamenttik talqylaýdyń, depýtattyq saýaldyń mazmuny men deńgeıi jańa satyǵa kóterildi. Osylaısha, bárimiz jańa saıası mádenıet qalyptastyrýǵa atsalystyq. Bıyl depýtattar Memleket basshysynyń «Kúshti Prezıdent – yqpaldy Parlament – esep beretin Úkimet» saıası formýlasyn iske asyrýǵa belsendi túrde úles qosty. Keler jyly Qasym-Jomart Kemeluly Toqaevtyń bastamalaryn júzege asyrý jáne halyqtyń múddesin qorǵaý boıynsha jurtshylyqpen tyǵyz qarym-qatynasta jumysty jalǵastyratyn bolamyz», - dedi palata tóraǵasy.